ភ្នំពេញ៖ រដ្ឋបាលក្រុងកែប បានចេញសេចក្តីជូនដំណឹងថ្មីមួយ ដោយតម្រូវអាជីវករនៅផ្សារក្តាម ឈប់ប្រើជញ្ជីងយូរដៃ ក្នុងការថ្លឹងគ្រឿងសមុទ្រអោយភ្ញៀវរបស់ខ្លួន។
នៅក្នុងសេចក្តីជូនដំណឹងរបស់រដ្ឋបាលក្រុងកែប បានឲ្យដឹងថា កន្លងមកអាជ្ញាធរក្រុងបានធ្វើការផ្សព្វផ្សាយណែនាំដល់បងប្អូនអាជីវករជាច្រើនលើករួចមក ហើយ អំពីការរៀបចំសណ្តាប់ធ្នាប់របៀបរៀបរយសាធារណៈ អនាម័យ បរិស្ថាន សោភ័ណភាព សុជីវធម៌ ពិសេសការលក់ក្ដាម បង្គារ ត្រី…ថ្លឹងជញ្ជីញមិនគ្រប់គីឡូ ជូនភ្ញៀវទេសចរណ៍ បណ្តាលឲ្យមានការរិះគន់ ពីសំណាក់សាធារណៈជនជាច្រើន។
ករណីនេះ បងប្អូនអាជីវករមួយចំនួនបានចូលរួមសហការអនុវត្ត ជាមួយអាជ្ញាធរបានល្អប្រសើរ ហើយបងប្អូនអាជីវករមួយចំនួនមិនបានអនុវត្តតាមការណែនាំរបស់អាជ្ញាធរ នៅឡើយ ។
រដ្ឋបាលខេត្តបញ្ជាក់ថា ដើម្បីរក្សាបាននូវសណ្តាប់ធ្នាប់របៀបរៀបរយសាធារណៈ បរិស្ថាន សេចក្តីថ្លៃថ្នូរ និងកិត្តិយស ទីក្រុងទេចណ៍ដ៏ប្រណិតរបស់យើង រដ្ឋបាលក្រុងកែបសូមធ្វើការណែនាំដូចខាងក្រោម ៖
១-ត្រូវរៀបចំកន្លែងលក់ដូរឲ្យមានសោភ័ណ្ឌភាព របៀបរៀបរយល្អ
២-មិនអនុញ្ញាតឲ្យប្រើជញ្ជីញយូរដៃជាដាច់ខាត ជញ្ជីញត្រូវមានបិទសញ្ញាសម្គាល់របស់មន្ទីរឧស្សា ហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ឲ្យបានត្រឹមត្រូវ ។ ៣-មិនអនុញ្ញាតឲ្យដើរចាប់ភ្ញៀវនៅលើផ្លូវសាធារណៈ ដែលធ្វើឲ្យប៉ះពាល់សណ្តាប់ធ្នាប់របៀបរៀបរយសាធារណៈ។
៤-ក្រោយពេលលក់ដូរចប់ ត្រូវធ្វើការវេចខ្ចប់សំរាមឲ្យបានត្រឹមត្រូវ
ក្នុងករណីបងប្អូនអាជីវករ មិនគោរពអនុវត្តតាមសេចក្ដីជូនដំណឹងនេះ អាជ្ញាធរក្រុងកែបនឹងចុះ រៀបចំសណ្តាប់ធ្នាប់ និងដឹកយកសម្ភារៈមករក្សាទុក ដើម្បីធ្វើកិច្ចសន្យាបញ្ឈប់ការលក់ដូរ និងពិន័យតាមច្បាប់ ជាធរមាន៕