មីនហ្គន់ ប៉ាតូដាវយី (Mingun Pahtodawgyi) គឺជាសំណង់មហាចេតិយស្ថិតនៅក្នុងទីប្រជុំជន Mingunចម្ងាយប្រមាណជិត ១០ គីឡូម៉ែត្រភាគពាយព្យនៃក្រុងម៉ាន់ដាឡាយ កណ្តាលប្រទេសមីយ៉ាន់ម៉ា គឺជាសំណង់សាសនាដ៏ធំមហិមា មើលមួយភ្លែតច្រឡំថាជាកូនភ្នំ។
បើទោះជាមហាចេតិយនេះសង់មិនទាន់រួចរាល់ ប៉ុន្តែ ចេតិយ មីនហ្គន់ ប៉ាតូដាវយី (Mingun Pahtodawgyi) ដ៏ធំមហិមា គឺជាសំណង់បុរាណសង់ពីឥដ្ឋដែលធំបំផុតក្នុងពិភពលោក ឈរប្របមាត់ទឹកទន្លេអីរ៉ាវ៉ាឌី។ បូជនីយដ្ឋាននេះត្រូវបានសាងសង់ឡើងនៅឆ្នាំ ១៧៩០ ដោយស្តេច បូដាវប៉ាយ៉ា តែបានឈប់កណ្ដាលទី។ បើសង់បង្ហើយ វានឹងក្លាយជាសំណង់ចេតិយធំជាងគេនៅលើលោក។
គ្រាន់តែការសាងសង់ទើបបានមួយភាគបីប៉ុណ្ណោះ មហាចេតិយ មីនហ្គន់ ប៉ាតូដាវយី (Mingun Pahtodawgyi) នេះមានកម្ពស់ ៥០ ម៉ែត្រ និងទំហំទទឹង ៧០ ម៉ែត្រ។ ស្ថិតចំកណ្ដាលអារាមកម្ពស់ ៥០ ម៉ែត្រ ដែលបែរទៅកាន់ទន្លេ គឺជាខ្លោងទ្វារប្រកបដោយក្បាច់ក្បូររចនាដ៏ធំមួយ។ នៅផ្នែកខាងក្នុង មានពុទ្ធរូបដែលតម្កល់នៅតាមទីសក្ការៈតូចមួយ។ នៅពីមុខបូជនីយដ្ឋានឆ្ពោះទៅកាន់ទន្លេ ជារូបចម្លាក់តោយក្សពីរក្បាលកម្ពស់ ២៩ ម៉ែត្រឈរត្រដែតការពារនៅខាងក្រៅអារាម។ 
អ្វីដែលគួរឲ្យស្ដាយទៀតនោះ ចេតិយ មីនហ្គន់ ប៉ាតូដាវយី (Mingun Pahtodawgyi) ត្រូវបានរងការបំផ្លាញអំឡុងពេលមានបាតុភូតរញ្ជួយដីកាលពីនៅឆ្នាំ ១៨៣៨។ បំណែកខ្លះនៃទីសំណង់អារាមនេះបែកប្រេះស្រាំ ហើយក្បាលរូបចម្លាក់តោទាំងពីរត្រូវបាក់រមៀលចូលទៅក្នុងទឹកទន្លេអីរ៉ាវ៉ាឌី។ ស្តេច បូដាវប៉ាយ៉ា បានប្រើកម្លាំងឈ្លើយសឹកសង្គ្រាម (សៀម) និងទាសកររាប់សិបពាន់នាក់ដើម្បីរៀបឥដ្ឋសង់បូជនីយដ្ឋាននេះ និងបានចំណាយពេល ៧ ឆ្នាំទើបអាចឡើងទៅដល់កម្ពស់ ៥០ ម៉ែត្រ។
នៅផ្នែកខាងលើនៃកំពូលអារាម ជួង មីហ្គន់ មានកម្ពស់ ៣,៦៦ ម៉ែត្រ អង្កត់ផ្ចិតប្រវែង ៥ ម៉ែត្រ និងទម្ងន់ ៩០ តោន។ ជួងនេះជាជួងបុរាណធំជាងគេបំផុតរយៈពេលជិត ២ សតវត្សមកហើយ លុះដល់ឆ្នាំ ២០០០ ទើបមានជួងធំបំផុតចាប់កំណើតនៅចិនគឺជួងសំណាងល្អ (Bell of Good Luck) នៅក្នុងវត្តហ្វូកហ្គាន់៕
