អន្តរជាតិ៖ ការពីថ្ងៃព្រហស្បតិ៍ ទី៦តុលា នៅថៃ មានការបាញ់រះ និងចាក់នឹងកាំបិត សម្លាប់មនុស្ស ៣៧នាក់ ក្នុងនោះមានកុមារ ២២ នាក់ បន្ទាប់ពីបានប្រព្រឹត្តិអំពើឃោរឃៅបង្ហូរឈាមនេះរួច បុរសជនដៃដល់ ដែលជាអតីតនគរបាលថៃ បានបើកឡានបុកមនុស្សតាមដងផ្លូវបន្ថែមទៀត មុននឹងទៅសម្លាប់ប្រពន្ធ-កូន រួចធ្វើអត្តឃាតសម្លាប់ខ្លួនឯង។ នេះបើតាមប្រភពពីស្នងការនគរបាលថៃ ប្រចាំនៅតំបន់កើតហេតុ។
ហេតុការណ៍សោកនាដកម្មនេះ កើតឡើងនៅមណ្ឌលថែទាំក្មេងតូច ប៉ែកខាងជើងនៃផ្ទៃប្រទេសថៃ វេលាម៉ោង១២និង៣០នាទី ថ្ងៃត្រង់ ម៉ោងក្នុងស្រុក។ តុល្យការបឋម ប្រភពពីប៉ូលិសថៃ ក្នុងខេត្ត ណង បួរ ឡាំភូ (Nong Bua Lamphu) គឺ នៅកន្លែងកើតហេតុ មានកុមារ យ៉ាងតិច ២៣នាក់ស្លាប់។ ពួកគេមានអាយុ ២-៣ឆ្នាំតែប៉ុណ្ណោះ។
ជនដៃដល់ បានបើកឡានបុកអ្នកដំណើរនិងអ្នកជិះម៉ូតូបណ្តាលឲ្យរបួសថែមទៀត មុននឹងទៅសម្លាប់ប្រពន្ធនិងកូនខ្លួនឯង ហើយនិងបាញ់សម្លាប់ខ្លួន។ ខ្មាន់កាំភ្លើង ឈ្មោះ ប៉ានយ៉ា ខេមរ៉ាប់ Panya Khamrab មានអាយុ៣៤ឆ្នាំ គឺជាអតីតប៉ូលិស ដែលត្រូវគេបញ្ឈប់ពីការងារ កាលពីឆ្នាំទៅមិញ ពីព្រោះតែមានជាប់ពាក់ព័ន្ធនឹងការប្រើប្រាស់គ្រឿងញៀន។ បញ្ហាគ្រឿងញៀននៅស្រុកថៃ ត្រូវអង្គការសហប្រជាជាតិដែលធ្វើការលើបញ្ហានេះ បានថ្កោលទោសព្រះរាជាណាចក្រថៃ ថាជាប្រទេសមួយដែលមានការចរាចរណ៍សារធាតុញៀននិងផលិតគ្រឿងញៀនច្រើន គឺស្ទើរតែច្រើនជាងគេនៅក្នុងចំណោមប្រទេសក្នុងតំបន់អាស៊ីអាគ្នេយ៍។ ថៃ ក៏ជាប្រទេសមួយដែលគេត្រូវថា មានការចរាចរណ៍អាវុធដោយធូររលុងដែរ។
ភ្លាមៗក្រោយកើតហេតុបង្ហូរឈាមនេះ លោក ប្រាយុទ្ធ ចាន់អូរចា បានថ្កោលទោសអំពើឃាតកម្មនេះថា«ព្រៃផ្សៃបំផុត» ហើយលោកបានថ្លែងក្តីសោកស្តាយរំលែកទុក្ខចំពោះក្រុមគ្រួសារជនរងគ្រោះ។ ទន្ទឹមនឹងគ្នានេះ លោកនាយករដ្ឋមន្ត្រីថៃ បានចេញបញ្ជាឲ្យបើកការស៊ើបអង្កេតជាបន្ទាន់។ នេះបើផ្អែកតាមខ្លឹមសារក្នុងគណនីហ្វេសបុករបស់លោកប្រមុខរដ្ឋាភិបាលថៃ។
ហេតុការណ៍ដ៏ស្លុតរន្ធត់ នៅពេលនេះ ដែលវាបង្កដោយអតីតប៉ូលីស គឺនាំឲ្យកាសែតក្នុងស្រុកនិងសាធារណមតិថៃ នឹកទៅដល់ការបាញ់រះសម្លាប់មនុស្ស កាលពីខែកុម្ភៈ ឆ្នាំ២០២១ នៅមណ្ឌលពាណិជ្ជកម្ម ណាខន រាជាស៊ីម៉ា (Nakhon Ratchasima) ដែលសម្លាប់មនុស្ស២៩នាក់។ ការបាញ់រះកាលនោះ គឺបង្កដោយប៉ូលិសម្នាក់ដែរ អាយុ៣១ឆ្នាំ ដែលបានឈ្លោះទាស់ទែងគ្នាជាមួយចៅហ្វាយនាយថ្នាក់លើរបស់ខ្លួន។ នៅគ្រានោះ លោកប្រមុខរដ្ឋាភិបាលថៃ ធ្លាប់បានប្រកាសចាត់ទុកថា នោះជាអំពើឃោរឃៅព្រៃផ្សៃអាក្រក់បំផុតមិនធ្លាប់ជួបទាល់តែសោះ ហើយរូបលោកមិនចង់ឃើញរឿងសោកនាដកម្មបែបនេះ កើតឡើងជាថ្មីទេ។ ប៉ុន្តែ ថ្ងៃព្រហស្បតិ៍នេះ រឿងស្លុតរន្ធត់ ដែលគេមិនចង់ឃើញ គឺបានផ្ទុះឡើងម្តងទៀត៕