ប្រទេសថៃ៖ នាយកដ្ឋានឧតុនិយមក្នុងប្រទេសថៃបានធ្វើ សេចក្តីប្រកាសលេខ ១៩ ពីព្យុះណូរុ (Noru) ចូលប្រទេសថៃ ដោយព្រមានប្រជាជនក្នុងខេត្តចំនួន ៦៤ ជាពិសេសនៅតំបន់ភាគកណ្តាល ឱ្យមានការប្រុងប្រយ័ត្នទប់ទល់នឹងភ្លៀងធ្លាក់ខ្លាំង ទឹកជំនន់ភ្លាមៗ ដែលអាចកើតមានឡើងពីឥទ្ធិពលព្យុះនេះ។
នាថ្ងៃទី២៩ ខែកញ្ញា ឆ្នាំ២០២២ វេលាម៉ោង៥.០០នាទីព្រឹក នាយកដ្ឋានឧតុនិយមក្នុងប្រទេសថៃ បាន ចេញសេចក្តីប្រកាសលេខ១៩ ដោយមានសេចក្ដីលម្អិតថានៅ ម៉ោង ៤.០០ ទៀបភ្លឺ ព្យុះណូរូ បានសំដៅ និង ផ្ដោតសំខាន់នៅក្នុងតំបន់ ស្រុកខាំឃៀនកែវ ខេត្តយៈសោធន នៅរយៈទទឹង ១៥.៦ ដឺក្រេភាគខាងជើង បណ្តោយ ១០៤.២ ដឺក្រេភាគខាងកើត ជាមួយនឹងល្បឿនខ្យល់អតិបរមាប្រមាណ ៥៥ គីឡូម៉ែត្រក្នុងមួយម៉ោង។
ខ្យល់ព្យុះនេះកំពុងផ្លាស់ទីទៅភាគពាយព្យបន្តិចម្ដងៗ ជាមួយនឹងល្បឿនប្រហែល ១០ គីឡូម៉ែត្រក្នុងមួយម៉ោង ក្នុងនោះវាត្រូវបានគេរំពឹងថានឹងចុះខ្សោយទៅជាសម្ពាធទាបខ្លាំងនៅដំណាក់កាលបន្ទាប់។ លើសពីនេះ ខ្យល់មូសុង និរតី ដែលបោកបក់លើសមុទ្រ Andaman ភាគខាងត្បូង និង ឈូងសមុទ្រថៃ មានកម្លាំងខ្លាំងខុសធម្មតា។
ដោយវាអាចបណ្តាលឱ្យមានភ្លៀងធ្លាក់ខ្លាំងនៅតំបន់ជាច្រើន ដូចជាតំបន់ខ្លះនៅភាគខាងជើង ភាគឦសាន ភាគកណ្តាល រួមទាំងទីក្រុងបាងកក និងតំបន់ជុំវិញភាគខាងកើត ព្រមទាំងភាគខាងត្បូងនៃប្រទេស។
អាស្រ័យហេតុនេះនាយកដ្ឋានឧតុនិយម បានអំពាវនាវដល់ប្រជាពលរដ្ឋនៅតំបន់នោះឱ្យមានការប្រុងប្រយ័ត្ន ចំពោះគ្រោះថ្នាក់ពីភ្លៀងធ្លាក់ខ្លាំង និងភ្លៀងធ្លាក់រាយប៉ាយពេញប្រទេស ហើយអាចបណ្តាលឱ្យមានទឹកជំនន់ភ្លាមៗ ជាពិសេសនៅតំបន់ជម្រាលភ្នំ និងតំបន់វាលភក់ ក៏ដូចជាសម្រាប់ប្រជាពលរដ្ឋ រស់នៅតាមឆ្នេរ សូមប្រយ័ត្នចំពោះគ្រោះថ្នាក់នៃរលកបោកបក់ខ្លាំង៕ ប្រភព៖ Kapook
.jpg)
