រាជធានីរីយ៉ាដ៖ កងទ័ពជើងទឹករបស់សហរដ្ឋអាមេរិក បានរាយការណ៍ អំពីការរឹបអូសបានគ្រឿងញៀន មានទម្ងន់ ជិត ២,៥តោន ដែលមានតម្លៃ ជិត១០០លានដុល្លារសហរដ្ឋអាមេរិក នៅក្នុងឈូងសមុទ្រអូម៉ង់ ជាមួយនឹងក្រុមដឹកនាំ ដោយអារ៉ាប៊ីសាអូត។
សារព័ត៌មានអារ៉ាប់អន្ដរជាតិ Alarabiya News បានចេញផ្សាយ កាលពីថ្ងៃអង្គារ ទី២៧ ខែកញ្ញា ថា កងទ័ពជើងទឹករបស់សហរដ្ឋអាមេរិក បានបញ្ជាក់ កាលពីថ្ងៃអង្គារ ថា ថ្នាំញៀន ប្រភេទ ហេរ៉ូអ៊ីន (Heroin) មានទម្ងន់ ប្រហែល ២ ៤១០គីឡូក្រាម មានតម្លៃ៨៥លានដុល្លារសហរដ្ឋអាមេរិក ដឹកតាមកប៉ាល់មួយគ្រឿង ឆ្លងកាត់ដែនទឹកអន្ដរជាតិ ហើយត្រូវបានកងទ័ពជើងទឹក រឹបអូសបាន។
កងទ័ពជើងទឹករបស់សហរដ្ឋអាមេរិក បានបញ្ជាក់ នៅក្នុងសេចក្ដីថ្លែងការណ៍របស់ខ្លួន កាលពីថ្ងៃអង្គារ ថា ឆ្មាំឆ្នេរសមុទ្ររបស់សហរដ្ឋអាមេរិក បានរឹបអូសថ្នាំញៀនហេរ៉ូអ៊ីន មានតម្លៃប្រមាណ៨៥លានដុល្លារ ចេញពីកប៉ាល់នេសាទមួយគ្រឿង ខណៈកំពុងល្បាត នៅក្នុងឈូងសមុទ្រអូម៉ង់ កាលពីថ្ងៃទី២៧ ខែកញ្ញា។ នេះជាការបង្ក្រាបគ្រឿងញៀនខុសច្បាប់ដ៏ធំបំផុត នៅតំបន់មជ្ឈិមបូព៌ា ដោយកងកម្លាំងជើងទឹកអន្តរជាតិ នៅឆ្នាំ២០២២នេះ។
លោក ប៊្រេដ ខូភើរ (Brad Cooper) មេបញ្ជាការ នៃបញ្ជាការកណ្តាលកងទ័ពជើងទឹកសហរដ្ឋអាមេរិក និង ជាមេបញ្ជាការកងនាវាទី៥របស់សហរដ្ឋអាមេរិក បានបញ្ជាក់ថា «ការរឹបអូសគ្រឿងញៀនដ៏ធំនេះ បង្ហាញពីការប្តេជ្ញាចិត្តយ៉ាងជ្រាលជ្រៅ នៅក្នុងចំណោមដៃគូអន្តរជាតិរបស់យើង ដើម្បីរំខាន និងរារាំងដល់សកម្មភាពអស្ថិរភាព នៅក្នុងតំបន់»៕
