អន្តរជាតិ៖ នៅក្នុងប្រទេសរុស្ស៊ី ដំណឹងកេណ្ឌទ័ពចំនួន ៣០០ ០០០នាក់ប្រកាសដោយប្រធានាធិបតីលោកពូទីនកាលពីថ្ងៃពុធ ទី២១ កញ្ញាបានបង្ខំឲ្យពលរដ្ឋខ្លះចាកចេញពីប្រទេស និងខ្លះទៀតផ្លាស់ទីកន្លែងទៅកាន់កន្លែងឆ្ងាយនៅជាប់ព្រំដែន។
ក្រុមប្រទេសជិតខាងរុស្ស៊ីជាគោលដៅនៃការចាកចេញរបស់ពលរដ្ឋរុស្ស៊ីដែលគេចពីការកេណ្ឌទ័ព។ នៅចំពោះមុខព្រឹត្តិការណ៍មួយនេះ គណៈកម្មការអឺរ៉ុបបានថ្លែងក្នុងថ្ងៃព្រហស្បតិ៍ ទី២២ កញ្ញាដោយអំពាវនាវឲ្យប្រទេសសមាជិកអឺរ៉ុបមានជំហររួមគ្នាក្នុងការទទួលពលរដ្ឋរុស្ស៊ី។ ខណៈនេះ មានពលរដ្ឋរុស្ស៊ីខ្លាំងបានទៅដល់ប្រទេសក្បែរខាង ក្នុងនោះមានប្រទេសហ្វាំងឡង់មួយដែរ។
ជាមួយគ្នានេះដែរវិមានក្រឹមឡាំង បានសារភាពថាខ្លួនពិតជាមានកំហុសមែនក្នុងការប្រមូលផ្តុំអ្នកបម្រុងកងទ័ពរុស្ស៊ីដើម្បីប្រយុទ្ធនៅអ៊ុយក្រែនចំពេលមានការប្រឆាំងជាសាធារណៈកាន់តែខ្លាំងឡើង។ នេះបើយោងតាមការចុះផ្សាយរបស់សារព័ត៌មាន BBC ៕
អ្នកនាំពាក្យរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយថា មានករណីជាច្រើននៅពេលដែលក្រឹត្យនេះត្រូវបានរំលោភបំពាន ដោយលោកបានសង្កត់ធ្ងន់ថា “កំហុសទាំងអស់នឹងត្រូវបានកែតម្រូវ” ។
របាយការណ៍ជាច្រើននិយាយថា មនុស្សដែលគ្មានបទពិសោធន៍យោធា ឬចាស់ពេក មនុស្សពិការកំពុងត្រូវបានកោះឲ្យចូលរួមធ្វើសង្រ្គាម ខណៈក្រឹត្យស្តីពីការចល័តទ័ពកាលពីសប្តាហ៍មុនបានបង្កឲ្យមានការតវ៉ាយ៉ាងរាលដាល។
ទោះបីជាយ៉ាងណាក៏ដោយ អ្នកជំនាញយោធាមួយចំនួននៅលោកខាងលិច និងអ៊ុយក្រែន និយាយថា ការសម្រេចចិត្តរបស់លោកពូទីន ក្នុងការហៅក្រុមអ្នកបម្រុងបង្ហាញថា កងទ័ពរុស្ស៊ីកំពុងបរាជ័យយ៉ាងធ្ងន់ធ្ងរនៅលើសមរភូមិក្នុងប្រទេសអ៊ុយក្រែន ពោលគឺជាង៧ខែ បន្ទាប់ពីទីក្រុងមូស្គូ បានបើកការឈ្លានពានរបស់ខ្លួន។
ចាប់តាំងពីការប្រកាសចលនានេះ មនុស្សជាង២,០០០នាក់ ត្រូវបានឃុំខ្លួននៅឯការតវ៉ានៅទូទាំងប្រទេសរុស្ស៊ី ខណៈមនុស្សរាប់រយនាក់ត្រូវបានចាប់ខ្លួនជុំវិញការការតវ៉ាក្នុងចលនាមួយនេះ។
គួរបញ្ជាក់ដែលថា មុនពេលចាប់ផ្តើមការលុកលុយរបស់ខ្លួននៅប្រទេសអ៊ុយក្រែនកាលពីថ្ងៃទី២៤ ខែកុម្ភៈ រុស្ស៊ីបានប្រមូលកងទ័ពប្រហែល ១៩០,០០០នាក់ នៅតាមបណ្តោយព្រំដែនអ៊ុយក្រែន ៕
