អន្តរជាតិ៖ ឥណ្ឌាដាក់ពង្រាយមនុស្ស ៣០០នាក់ ដើម្បីធ្វើប្រតិបត្តិការចាប់ខ្លារខិនដ៏កម្រមួយក្បាលកំពុងដំណើរការនៅរដ្ឋ Karnataka ភាគខាងត្បូងប្រទេសឥណ្ឌា ដែលប្រើរយៈពេលអស់ជាង ២៧ ថ្ងៃ។ សត្វខ្លាមួយក្បាលនេះបានក្លាយជាប្រធានបទក្ដៅសម្រាប់សារព័ត៌មានក្នុងស្រុកចាប់តាំងពីថ្ងៃទី ៥ ខែសីហា នៅពេលដែលវាវាយប្រហារកម្មករនៅក្នុងទីក្រុង Belgaum ។ នេះបើយោងតាមការចុះផ្សាយរបស់សារព័ត៌មាន BBC ។
ខ្លារខិននោះបានបើកឆាកវាយប្រហារបុរសម្នាក់បណ្ដាលឲ្យរងរបួសធ្ងន់ ខណៈចាប់តាំងពេលនោះមក វាត្រូវបានគេប្រទះឃើញពីរបីដងនៅជុំវិញទីលានវាយកូនហ្គោលក្នុងទីក្រុង ដែលបង្កឱ្យមានការភ័យស្លន់ស្លោក្នុងចំណោមអ្នកស្រុក។ នាយកដ្ឋានព្រៃឈើរបស់រដ្ឋបានដាក់ពង្រាយមនុស្សប្រហែល ៣០០ នាក់ ដែលរួមមាន ពេទ្យសត្វ និងអ្នកបាញ់កាំភ្លើង រហូតដល់អ្នកចាក់ថ្នាំស្ពឹក ដើម្បីចាប់ខ្លារខិនមួយក្បាលនេះហើយដោះលែងវាទៅក្នុងព្រៃ ប៉ុន្តែប្រតិបត្តិការនេះមិនទទួលបានជោគជ័យរហូតមកដល់ពេលនេះ។
បញ្ហានេះក៏បានបង្កជាភ្លើងនយោបាយនៅក្នុងប្រទេសផងដែរ ដោយអ្នកនយោបាយប្រឆាំងបានស្នើឱ្យរដ្ឋមន្ត្រីព្រៃឈើរបស់រដ្ឋ លោក Umesh Katti លាលែងពីតំណែង។ ខណៈ លោក Katti បានលើកឡើងថា៖«លោកបានត្រៀមខ្លួនធ្វើដូច្នេះ ប្រសិនបើខ្លារខិនត្រូវចាប់បាន»។
លោក Vijayakumar Gogi មន្ត្រីព្រៃឈើកំពូលនៅក្នុងរដ្ឋបានប្រាប់សារព័ត៌មាន BBC ថា៖«មានសម្ពាធសាធារណៈជាច្រើន ដើម្បីចាប់ខ្លារខិនក្នុងពេលឆាប់ៗនេះ ដូច្នេះបុគ្គលិកកាន់តែច្រើនត្រូវបានបញ្ជូនទៅកាន់ប្រតិបត្តិការ»។
ខ្លារខិនគឺជាប្រភេទសត្វដែលខ្មាស់អៀន ប៉ុន្តែប៉ុន្មានឆ្នាំមកនេះ មានរបាយការណ៍ជាច្រើនអំពីពួកវាបានចូលទៅក្នុងភូមិ និងទីក្រុងរបស់ប្រទេសឥណ្ឌា ដើម្បីស្វែងរកសត្វព្រៃជាអាហារ ក្រោយព្រៃឈើកាន់តែថយចុះ។
រដ្ឋ Karnataka ដែលមានតំបន់ព្រៃឈើដ៏ធំ និងជម្រកសត្វព្រៃជាច្រើន មានខ្លារខិនចំនួន ១៧៨៣ ក្បាល ដែលជាចំនួនខ្ពស់បំផុតទីពីរនៅក្នុងប្រទេស នេះបើយោងតាមទិន្នន័យរបស់រដ្ឋាភិបាល។ ជារឿយៗសត្វនេះត្រូវបានគេប្រទះឃើញនៅក្នុងទីក្រុងធំៗក្នុងរដ្ឋដូចជា ទីក្រុង Bangalore និង ទីក្រុង Mysore ៕
