ជំងឺលើសសម្ពាធឈាម ត្រូវបានគេដឹងថា គឺជាជំងឺទូទៅមួយប្រភេទ ដែលអាចកើតមានឡើងចំពោះមនុស្សគ្រប់វ័យ ព្រមទាំងត្រូវបានគេស្គាល់ថាជាឃាតករលាក់មុខដែលអាចសំលាប់យើងបានគ្រប់ពេលវេលាថែមទៀតផង ។ ជាមួយគ្នានេះ ជំងឺលើសឈាម ក៏ត្រូវបានចូលរួមចំណែកជាមួយទម្លាប់នៃការរស់នៅមិនល្អផងដែរ ។
ដូច្នេះប្រសិនជាអ្នកកំពុងតែប្រឈមជាមួយជំងឺលើសសម្ពាធឈាមនោះ អ្នកអាចសាកល្បងអនុវត្តនូវទម្លាប់ខាងក្រោមនេះ ដើម្បីរក្សាលំនឹងសុខភាព និងការពារគ្រោះថ្នាក់ណាមួយ ៖
- រក្សាទម្ងន់ និងចង្កេះ
យោងទៅតាមអ្នកជំនាញបានបង្ហាញឲ្យដឹងថា ជំងឺលើសឈាម ជារឿងធម្មតាវាតែងតែកើតឡើងចំពោះអ្នកឡើងទម្ងន់ ឬអ្នកដែលមានក្បាលពោះធំ។ ដោយការលើសទម្ងន់ និងធាត់ទាំងអសនេះក៏បណ្តាលឱ្យមានរោគសញ្ញារំខាននៃមុខងារផ្លូវដង្ហើម ក៏ដូចជាការពិបាកដកដង្ហើមក្នុងពេលគេងផងដែរ ។
- ធ្វើលំហាត់ប្រាណទៀងទាត់
ការធ្វើលំហាត់ប្រាណទៀងទាត់ ពិតជាមានសារៈខ្លាំងណាស់ក្នុងការជួយកាត់បន្ថយសម្ពាធឈាមយ៉ាងមានប្រសិទ្ធភាព។ ដោយក្រុមគ្រូពេទ្យបេះដូងបានធ្វើការណែនាំថា ការធ្វើលំហាត់ប្រាណ 150 នាទីក្នុងមួយសប្តាហ៍ ឬ 30 នាទីក្នុងមួយថ្ងៃ ពិតជាអាចកាត់បន្ថយសម្ពាធឈាមរបស់អ្នកពី 5 ទៅ 8 mm Hg ប្រសិនបើអ្នកមានសម្ពាធឈាមខ្ពស់។
- ទទួលទានរបបអាហារល្អចំពោះសំពាធឈាម
ដើម្បីរក្សាលំនឹងសម្ពាធឈាម អ្នកជំងឺភាគច្រើនត្រូវបានក្រុមគ្រូពេទ្យណែនាំឲ្យទទួលទានអាហារដូចជា គ្រាប់ធញ្ញជាតិ ផ្លែឈើ បន្លែ ផលិតផលទឹកដោះគោមានជាតិខ្លាញ់ទាប ស៊ុត ត្រី និងអាហារខ្លាញ់ទាប។ ដោយអាហារទាំងអស់នេះអាចជួយបញ្ចុះសម្ពាធឈាមរបស់អ្នករហូតដល់ 11 mm Hg ប្រសិនបើអ្នកមានសម្ពាធឈាមខ្ពស់។ ជាមួយគ្នានេះវាក៏ជួយការពារអ្នកពីជំងឺដាច់សរសៃឈាមខួរក្បាលផងដែរ ។ លើសពីនេះ ការប្រើប្រាស់អាហារដែលមានជាតិប៉ូតាស្យូមខ្ពស់ ក៏ជួយក្នុងការកាត់បន្ថយអំបិលសម្រាប់ជំងឺលើសឈាមផងដែរ ។
