ក្រពេញទីរ៉ូអ៊ីត គឺជាសរីរាង្គ endocrine ដែលផលិតអរម៉ូនជួយគ្រប់គ្រងការរំលាយអាហារនៅក្នុងរាងកាយ។ ដោយភាគច្រើនងាយកើតឡើងចំពោះស្ត្រីជាជាងបុរស បើយោងតាមរបាយការណ៍មួយបានបង្ហាញថា ស្ត្រីម្នាក់ក្នុងចំណោម 8 នាក់នៅលើពិភពលោកមានបញ្ហាក្រពេញទីរ៉ូអ៊ីត។ ហើយ60% នៃស្ត្រីដែលមានបញ្ហាក្រពេញទីរ៉ូអ៊ីតនេះភាគច្រើនគឺពួកគេមិនបានដឹងអំពីរោគសញ្ញានៃជំងឺនេះមុនឡើយ ។
ខាងក្រោមនេះគឺជារោគសញ្ញាមួយចំនួននៃជំងឺក្រពេញទីរ៉ូអ៊ីត ដែលអ្នកមិនគួរមើលរំលង៖
– ពិបាកគេង
ភាពមិនដំណើរការនៃក្រពេញទីរ៉ូអ៊ីត អាចផ្ដល់នូវផលប៉ះពាល់ដល់គុណភាពនៃការគេងយ៉ាងខ្លាំង។ ដោយអ្នកដែលជួបប្រទះជាមួយនឹងជំងឺនេះ តែងតែជួយប្រទះនូវការបែកញើសពេលយប់ និងការនោមញឹកញាប់ ដែលជាការរំខានយ៉ាងខ្លាំងដល់ដំណេក នឹងធ្វើឲ្យពិបាកក្នុងការគេង ។
– ការឡើង ឬចុះទម្ងន់ដែលមិនអាចពន្យល់បាន
ជំងឺក្រពេញទីរ៉ូអ៊ីតមានឥទ្ធិពលយ៉ាងខ្លាំងទៅលើការរំលាយអាហារ និងការរក្សាទម្ងន់ក្នុងកម្រិតស្ថិរភាព។ ខណៈពេលដែលមានហេតុផលជាច្រើនសម្រាប់ការឡើងឬស្រកទម្ងន់ ដោយមិនអាចពន្យល់បាន ដោយវាជារឿងដ៏សំខាន់ដែលត្រូវយកចិត្តទុកដាក់។ ជាមួយគ្នានេះក៏ត្រូវបានគេសម្គាល់ផងដែរថា ប្រសិនបើក្រពេញទីរ៉ូអ៊ីតស្ថិតក្នុងកម្រិតទាបនោះវាអាចបណ្តាលឱ្យឡើងទម្ងន់មិនធម្មតា។ ដោយទន្ទឹមនឹងនេះ ប្រសិនក្រពេញទីរ៉ូអ៊ីតសកម្មខ្លាំងពេកនោះ វាអាចបណ្តាលឱ្យអ្នកស្រកទម្ងន់យ៉ាងខ្លាំងដោយមិនអាចពន្យល់បាន ។
– ថប់បារម្ភ ឬ ខ្សោយការចងចាំ
ស្ត្រីដែលមានបញ្ហាក្រពេញទីរ៉ូអ៊ីតក៏អាចប្រឈមមុខនឹងការផ្លាស់ប្តូរសុខភាពផ្លូវចិត្តផងដែរ។ ប្រសិនក្រពេញទីរ៉ូអ៊ីតមិនដំណើរការទេនោះ វាអាចនឹងនាំអោយមានភាពតានតឹង ថប់បារម្ភ ញ័ររាងកាយ ឆាប់ខឹង អារម្មណ៍ប្រែប្រួល ការចងចាំចុះខ្សោយ ថយចុះការផ្តោតអារម្មណ៍ និងអ័ព្ទខួរក្បាលជាដើម ។
– ការមករដូវមិនទៀងទាត់
ការផ្លាស់ប្តូរនៃវដ្តរដូវក៏ជាមូលហេតុចម្បងមួយដែរឆ្លុះបញ្ចាំងពីបញ្ហាសុខភាពជាច្រើនរបស់ស្ត្រីផងដែរ។ ហើយជាមួយគ្នានេះអ្នកដែលកើតមានជំងឺក្រពេញទីរ៉ូអ៊ីត ក៏មានការប៉ះពាល់ជាមួយនឹងវដ្តរដូវ និងការអស់រដូវដំបូង ឬចុងក្រោយ ផងដែរ ។
