នៅពេលនិយាយអំពីសារធាតុចិញ្ចឹមដែលមានប្រយោជន៍បំផុតសម្រាប់ទារកនោះ ច្បាស់ណាស់គឺគេនឹងលើកយក “ទឹកដោះម្តាយ” មកជាក់ជាមិនខាន ។
ដោយទឹកដោះម្ដាយ គឺពិតជាមានប្រយោជន៍ និងមានជីវជាតិខ្ពស់ ព្រមទាំងជាប្រភពអាហារពេញលេញបំផុតមួយសម្រាប់ទារក ដែលជួយឱ្យខួរក្បាលទារកមានភាពឆ្លាតវៃ ព្រមទាំងផ្ដល់នូវសេចក្តីស្រឡាញ់ និងភាពកក់ក្តៅចំពោះម្ដាយទៅកាន់តែទារកបានយ៉ាងល្អផងដែរ។
ជាមួយគ្នានេះបើយោងទៅតាមអង្គការសុខភាពពិភពលោក (WHO) បានធ្វើការណែនាំថា ម្ដាយគ្រប់រូបគួរតែបំបៅកូនដោយទឹកដោះរបស់ខ្លួនយ៉ាងហោចណាស់ 6 ខែ និងអាចបន្តរហូតដល់ 2 ឆ្នាំ ។ ព្រោះតែទឹកដោះម្តាយមានផ្ទុកនូវសារធាតុជីវសាស្ត្រជាច្រើនដូចជាអង្គបដិប្រាណ និងប្រូតេអ៊ីន ដែលជួយពង្រឹងប្រព័ន្ធភាពស៊ាំ ប្រឆាំងអុកស៊ីតកម្ម និងវីតាមីនសម្រាប់ទារកបានយ៉ាងពេញលេញ រួមទាំងផ្ទុកនូវកោសិការស់ផ្សេងៗទៀត រួមទាំងកោសិកា និងបាក់តេរីដែលល្អសម្រាប់ប្រព័ន្ធរំលាយអាហាររបស់ទារកផងដែរ។
ដូច្នេះប្រសិនបើកូនរបស់អ្នកបៅទឹកដោះម្តាយបានត្រឹមត្រូវ នោះវានឹងជួយការពារទារកពីការឆ្លងមេរោគ និងកាត់បន្ថយឱកាសនៃជំងឺរ៉ាំរ៉ៃដូចជា ធាត់ ទឹកនោមផ្អែម នៅពេលពួកគេធំឡើង ។
ហើយអ្វីដែលពិសេសជាងនេះទៅទៀតនោះ គឺទារកនឹងទទួលបានសារធាតុចិញ្ចឹមពេញលេញ ក្នុងការបង្កើតភាពស៊ាំនឹងជំងឺ ងាយស្រួលក្នុងការរំលាយអាហារ និងទទួលទាន មិនងាយជួបប្រទះនូវបញ្ហាទល់លាមកថែមទៀតផង ៕
