បាក់ស្ពាន នៅកណ្ដាលទីក្រុងបាងកក ស្លាប់និងរបួសជាច្រើននាក់

រាជធានីបាងកក៖ យ៉ាងហោចណាស់ ក៏មានមនុស្ស២នាក់បាត់បង់ជីវិត និង ២នាក់ផ្សេងទៀតបានរងរបួសនោក្នុងហេតុការណ៍បាក់ស្ពាន កាលពីរាត្រី ថ្ងៃអាទិត្យ ទី៣១ ខែកក្កដា នៅតាមផ្លូវរ៉ាម៉ាទី២ (Rama II) ក្រុងបាងកក ប្រទេសថៃ។

សារព័ត៌មានថៃ The Nation បានចេញផ្សាយ កាលពីព្រឹក ថ្ងៃទី១ ខែសីហា ថា ស្ពានដែលបង្កគ្រោះថ្នាក់នេះ ស្ថិតក្រោមការជួសជុល ហើយវាមានទីតាំងនៅទល់មុខមន្ទីរពេទ្យវីផារ៉ាម (Vibharam ) ផ្លូវ Rama II ស្ថិតក្នុងស្រុក Muang ខេត្ត Samut Sakhon។ គ្រោះថ្នាក់នោះ បានកើតឡើង ដោយសារធ្នឹមស្ពានអាកាសមួយប្រឡោះ បានបាក់ធ្លាក់ សង្កត់មកលើរថយន្ត និងមនុស្ស ខណៈពួកគេកំពុងតែធ្វើដំណើរ នៅតាមដងផ្លូវ រ៉ាម៉ា២ ចូលមកកាន់ក្រុងបាងកក កាលពីម៉ោង៩យប់ ថ្ងៃទី៣១ ខែកក្កដា ឆ្នាំ២០២២។ នៅក្នុងហេតុការណ៍នោះ បានបណ្ដាលឱ្យមានមនុស្ស២នាក់បាត់បង់ជីវិត និង ២នាក់ផ្សេងទៀតរងរបួស។

ក្រុមអ្នកជួយសង្គ្រោះ ក៏បានចុះទៅកាន់កន្លែងកើតហេតុភ្លាមៗ ដើម្បីធ្វើការអន្តរាគមន៍ និង ជួយសង្គ្រោះជីវិតមនុស្ស ចេញគំនរបាក់បែក ហើយផ្លូវមួយខ្សែ ក៏បានបិទចរាចរណ៍ជាបណ្ដោះអាសន្ន។ ចំណែកអ្នករងរបួស ក៏ត្រូវបានបញ្ជូនកាន់មន្ទីរពេទ្យភ្លាមៗផងដែរ៕