ខេត្តសៀមរាប៖ ឡដុតធ្យូងរបស់ប្រជាពលរដ្ឋជាច្រើនកន្លែង នៅភូមិចាន់ហៀ ឃុំបឹងមាលា ស្រុកស្វាយលើ ត្រូវកម្លាំងសមត្ថកិច្ចរដ្ឋបាលព្រៃឈើស ហការជាមួយកម្លាំងសមត្ថកិច្ចស្រុកស្វាយលើ ចុះវាយកម្ទេចចោល ដោយចាត់ទុកថា វាជាមុខរបរមួយបានបំផ្លាញធនធានធម្មជាតិយ៉ាងធ្ងន់ធ្ងរ។មន្ត្រីរដ្ឋបាលព្រៃឈើ បានឲ្យដឹងថា ប្រតិបត្តិការនេះ គឺចុះធ្វើកិច្ចសន្យាបញ្ឈប់សកម្មភាពការសាងសង់ឡដុតធ្យូង និងរុះរើឡធ្យូង។ មុនដំណើរការអនុវត្តច្បាប់ ក្រុមការងារបានប្រជុំពិភាក្សា ដោយបានលើកយកពីបញ្ហាប្រឈម និងការងារអនុវត្តច្បាប់ស្តីពីព្រៃឈើ យកមកជជែកដោះស្រាយនៅក្នុងអង្គពិភាក្សារួមគ្នារួចហើយ។
មន្ត្រីរដ្ឋបាលព្រៃឈើ បានបញ្ជាក់ថា ក្រុមការងារបានសម្រេចថា ចំពោះឡណាដែលកំពុងដុត និងឡដែលមិនទាន់ប្រមូលផល ក្រុមការងារបានសម្រេចធ្វើកិច្ចសន្យាទុកសុពលភាពរយ:ពេល៣០ថ្ងៃ ក្រោយពេលប្រមូលផលហើយឲ្យពួកគាត់រុះរើដោយខ្លួនឯង។ ដោយឡែកឡ ដែលប្រមូលផលហើយនៅទំនេរ ក្រុមការងារ និងរុះរើផ្ទាល់នៅនឹងងកន្លែង។ ជាលទ្ធផលក្រុមការងារសម្រេចធ្វើកិច្ចសន្យាបញ្ឈប់សកម្មភាពបាន៥៤ម្ចាស់ ដែលមានឡធ្យូងចំនួន៥៧ឡ និងបានរុះរើបំផ្លាញចោលបានចំនួន២៨ឡ។
ជាមួយគ្នានោះដែរ មន្ត្រីរដ្ឋបាលព្រៃឈើ បានអំពាវនាវដល់ប្រជាពលរដ្ឋទាំងអស់ ដែលប្រកបមុខរបរដុតធ្យូង ត្រូវបញ្ឈប់ជាបន្ទាន់ចំពោះសកម្មភាពបែបនេះ ព្រោះវាជាមុខរបរមួយបានបំផ្លាញធនធានធម្មជាតិយ៉ាងធ្ងន់ធ្ងរ៕
Home ព័ត៌មានជាតិ