នៅពេលដែលមានប្រព័ន្ធការពាររាងកាយដែលមានសុខភាពល្អ រាងកាយអាចប្រយុទ្ធប្រឆាំងនឹងមេរោគពីមជ្ឈដ្ឋានជុំវិញ ប៉ុន្តែប្រសិនបើអ្នកមានទម្លាប់អាក្រក់ទាំងនេះ ប្រព័ន្ធភាពស៊ាំរបស់អ្នកនឹងកាន់តែខ្សោយទៅៗ ព្រមទាំងអាចបណ្ដាលឲ្យអ្នកជួបប្រទះនូវជំងឺមួយចំនួនផងដែរ ។
– គេងមិនលក់
ការគេងមិនគ្រប់គ្រាន់ជាញឹកញាប់និងធ្វើឱ្យរាងកាយធ្លាក់ទៅក្នុងស្ថានភាពនឿយហត់ និងកាត់បន្ថយចំនួនកោសិកាភាពស៊ាំដែលរាងកាយផលិតបានយ៉ាងខ្លាំង។យោងតាមអ្នកស្រាវជ្រាវនៅសាកលវិទ្យាល័យ Chicagoបានបង្ហាញប្រាប់ឲ្យដឹងថា មនុស្សដែលគេងបានត្រឹមតែ 4 ម៉ោងក្នុងមួយថ្ងៃ អាចបណ្ដាលឲ្យកើតមានប្រព័ន្ធការពារជំងឺគ្រុនផ្តាសាយតិចជាង 50 ភាគរយនៅក្នុងឈាមរបស់ពួកគេ ជាងអ្នកដែលគេង 7 ទៅ 8 ម៉ោងក្នុងមួយថ្ងៃ។
– គិតអវិជ្ជមាន
យោងតាមការសិក្សាមួយចំនួនបានបង្ហាញប្រាប់ឲ្យដឹងថា មនុស្សដែលដឹកនាំជីវិតប្រកបដោយសុទិដ្ឋិនិយម និងសប្បាយរីករាយ ទំនងជាមិនសូវឈឺ ជាងអ្នកដែលរស់នៅក្នុងស្ថានភាពផ្លូវចិត្តអវិជ្ជមាន។ ជាងនេះទៅទៀតពួកគេក៏មានអាយុវែងជាងអ្នកទុទិដ្ឋិនិយមផងដែរ ។ មូលហេតុគឺនៅពេលដែលគិតវិជ្ជមានចំនួនកោសិកាឈាមសដែលទាក់ទងនឹងភាពស៊ាំក្នុងរាងកាយកើនឡើង។
– មានភាពតានតឹងហួសហេតុ
នេះគឺជាមូលហេតុចម្បងនៃប្រព័ន្ធភាពស៊ាំចុះខ្សោយ Kathleen Dass អ្នកជំនាញខាងភាពស៊ាំបាននិយាយថា “នៅពេលដែលអ្នកមានភាពតានតឹង រាងកាយរបស់អ្នកនឹងបញ្ចេញ cortisol និង adrenaline ដែលជាអរម៉ូនកាត់បន្ថយកម្រិតនៃ lymphocytes និង phagocytes” ។
ក្រៅពីនេះ ភាពតានតឹងក៏បណ្តាលឱ្យមានអាកប្បកិរិយាមិនល្អជាបន្តបន្ទាប់ដូចជា ការផឹកស្រា ការជក់បារី ការគេងមិនលក់ និងការមិនឃ្លានអាហារជាដើម។
– ខ្ជិលហាត់ប្រាណ
យោងតាមការស្រាវជ្រាវ ពេលដែលធ្វើលំហាត់ប្រាណ 30-45 នាទី/ថ្ងៃ ធ្វើលំហាត់ប្រាណ 5 ថ្ងៃ/សប្តាហ៍ ឲ្យបានទៀងទាត់ 12 សប្តាហ៍ ចំនួនកោសិកាភាពស៊ាំនឹងកើនឡើង ព្រមទាំងមានភាពធន់កើនឡើងគួរឱ្យកត់សម្គាល់ផងដែរ ។
– ការជក់បារីដោយផ្ទាល់និងដោយប្រយោល
មនុស្សគ្រប់គ្នាបានដឹងអំពីផលប៉ះពាល់នៃផ្សែងបារីចំពោះសុខភាពជាច្រើនមកហើយ បើតាមស្ថិតិមួយនៅសហរដ្ឋអាមេរិកបានបង្ហាញថា អ្នកមិនជក់បារី 3,000 នាក់បានស្លាប់ដោយសារជំងឺមហារីកសួត កុមារ 300,000 នាក់កើតជំងឺផ្លូវដង្ហើម ព្រោះតែផ្សែងបារីទាំងអស់នេះធ្វើឱ្យប្រព័ន្ធផ្លូវដង្ហើមចុះខ្សោយយ៉ាងធ្ងន់ធ្ងរ និងកាត់បន្ថយភាពស៊ាំនៃរាងកាយរបស់កុមារ។
– ថ្នាំអង់ទីប៊ីយោទិច
ការប្រើប្រាស់ថ្នាំអង់ទីប៊ីយោទិចច្រើនពេក អាចធ្វើឲ្យកាត់បន្ថយចំនួន cytokines (កោសិកាឈាមសដែលប្រឆាំងនឹងភ្នាក់ងារបង្ករោគ) និងអរម៉ូនសំខាន់ៗនៃប្រព័ន្ធភាពស៊ាំក្នុងអំឡុងពេលឆ្លង។ ក្រៅពីនេះ ការប្រើថ្នាំផ្សះច្រើនពេកក៏ធ្វើឲ្យមេរោគធន់នឹងថ្នាំផងដែរ។
– ញញឹមតិច
យោងតាមការស្រាវជ្រាវពីសាកលវិទ្យាល័យ Loma Linda University School of Medicine ក្នុងរដ្ឋកាលីហ្វ័រញ៉ាបានបង្ហាញប្រាប់ឲ្យដឹងថា ការសើចអាចជួយកាត់បន្ថយការសំងាត់នៃអរម៉ូនស្ត្រេស បង្កើនចំនួនកោសិកាភាពស៊ាំ ធ្វើអោយប្រសើរឡើងនូវចរន្តឈាម បង្កើនលំហូរអុកស៊ីសែនតាមរយៈការដកដង្ហើម និងបន្ធូរអារម្មណ៍អវិជ្ជមានបានយ៉ាងល្អ៕
អត្ថបទដោយ៖ សុផានីត