រាជធានីបាងកក៖ ស្របពេលវីរុសបំប្លែងខ្លួថ្មីអូមីក្រុង កំពុងតែកើនឡើងយ៉ាងខ្លាំងនោះ ក្រសួងសាធារណសុខាភិបាលថៃ បានស្នើសុំឲ្យ CCSA ពន្យារពេលដំណើរការគម្រោង Test & Go រហូតដល់ចុងខែមករា ដើម្បីវាយតម្លៃ ពីស្ថានការណ៍កូវីដ-១៩ជាថ្មី។
សារព័ត៌មានថៃ The Nation បានចេញផ្សាយ នៅថ្ងៃទី៣ ខែមករា ឆ្នាំ២០២២ ថា ក្រសួងសាធារណសុខាភិបាលថៃ នៅថ្ងៃចន្ទ ទី៣ ខែមករា បានស្នើដល់មជ្ឈមណ្ឌលគ្រប់គ្រងស្ថានការណ៍កូវីដ-១៩ (ហៅកាត់ CCSA) បញ្ឈប់ការបើកឡើងវិញនូវគម្រោង Test & Go របស់ប្រទេសថៃ ហើយវាយតម្លៃ អំពីស្ថានភាពកូវីដ-១៩ រហូតដល់ចុងខែមករា នេះ។
រដ្ឋាភិបាលរបស់លោកឧត្ដមសេនីយ៍ ប្រាយុទ្ធ ចាន់អូចា នាយករដ្ឋមន្រ្ដីថៃ បានដាក់ចេញនូវគម្រោង Test & Go ដើម្បីលើកកម្ពស់ដល់វិស័យទេសចរណ៍ នៅក្នុងប្រទេសអាស៊ានមួយនេះ ដោយរំពឹងថា អាចនឹងរកបានប្រាក់ចំណូលបាន រហូតដល់ជាង៣០ពាន់លានដុល្លារ។
Test & Go អនុញ្ញាតដល់អ្នកទេសចរបរទេសណា ដែលបានចាក់វ៉ាក់សាំង ចំនួន២ដូសរួចរាល់ហើយ អាចចូលមកកាន់ប្រទេសថៃ បាន ដោយមិនចាំបាច់ធ្វើចត្ដាឡីស័ក។ ប៉ុន្ដែគម្រោងនេះ ត្រូវបានផ្អាកទៅវិញ កាលពីថ្ងៃទី២១ ខែធ្នូ ឆ្នាំ២០២១ ក្នុងគោលបំណងទប់ស្កាត់ការឆ្លងរីករាលដាល ពីវីរុស Omicron ។ មជ្ឈមណ្ឌលគ្រប់គ្រងស្ថានការណ៍កូវីដ-១៩ (ហៅកាត់ CCSA) គ្រោងនឹងវាយតម្លៃឡើងវិញ ចំពោះការផ្អាកលើគម្រោងនេះ នៅថ្ងៃទី៤ ខែមករា។
លោក Anutin Charnvirakul រដ្ឋមន្រ្ដីក្រសួងសាធារណសុខាភិបាល បានបញ្ជាក់ថា ជនបរទេសទាំងឡាយណា ដែលបានចុះឈ្មោះ នៅក្នុងគម្រោង Test & Go ត្រូវតែចូលមកកាន់ប្រទេសថៃ មុនថ្ងៃទី១០ ខែមករា។ ប៉ុន្ដែចាប់ពីក្រោយថ្ងៃទី១០ ខែមករា ទៅ ពួកគេអាចចុះឈ្មោះ ក្រោមគម្រោង Phuket Sandbox ឬ ប្រើប្រាស់សេវាកម្ម AQ វិញ៕