រាជធានីបាងកក៖ នៅក្នុងអំឡុងពេលឈប់សម្រាក នៃពិធីបុណ្យចូលឆ្នាំថ្មី (ឆ្នាំសកល) នេះ ចំនួនអ្នកឆ្លងវីរុសអូមីក្រុង (Omicron) បានកើនឡើងដល់ ជាង១ ០០០នាក់។
សារព័ត៌មានថៃ The Nation បានចេញផ្សាយ នៅថ្ងៃទី៣ ខែមករា ឆ្នាំ២០២២ ថា នាយកដ្ឋានវិទ្យាសាស្រ្ដវេជ្ជសាស្ត្រ បានបញ្ជាក់ កាលពីថ្ងៃអាទិត្យ ទី២ ខែមករា ថា ចំនួនករណីឆ្លងវីរុសបំប្លែងខ្លួនថ្មី Omicron នៅក្នុងប្រទេសថៃ បានកើនឡើង ជាង១ 000ករណី។
លោកវេជ្ជបណ្ឌិត Supakit Sirilak អគ្គនាយក នៃនាយកដ្ឋានវិទ្យាសាស្រ្ដវេជ្ជសាស្រ្ដ បានបញ្ជាក់ថា ចាប់ពីថ្ងៃទី១ ខែវិច្ឆិកា ឆ្នាំ២០២១ដល់ថ្ងៃទី១ ខែមករា ឆ្នាំ២០២២ ចំនួនករណីអូមីក្រុង នៅក្នុងប្រទេសថៃ បានកើតឡើងយ៉ាងខ្លាំង ហើយអ្នកឆ្លងទាំងនោះ ភាគច្រើនជាជនបរទេស។ សូម្បីត្រឹមតែថ្ងៃសៅរ៍ ទី១ ខែមករា រកឃើញវិជ្ជមាន នៃអូមីក្រុង ចំនួន១៨៩ករណី។ ហើយក្នុងនោះមានជនបរទេស ចំនួន៦៨ករណី និងអ្នកឆ្លងក្នុងប្រទេស ១២១នាក់។ ករណីអូមីក្រុងនេះ បានរកឃើញ នៅតាមខេត្ត ចំនួន៤៧ នៅទូទាំងប្រទេស។
លោកវេជ្ជបណ្ឌិត Supakit Sirilak បានបន្ថែមថា ខេត្តដែលមានករណីឆ្លងអូមីក្រុង ខ្ពស់ជាងគេ រួមមាន ទីក្រុង Bangkok (395ករណី), Kalasin (195ករណី), Chonburi (148ករណី), Phuket (125ករណី) and Roi Et (119ករណី)។
សារព័ត៌មានបាងកកប៉ុស្ដិ៍ បានចេញផ្សាយ នៅរសៀល ថ្ងៃទី៣ ខែមករា ឆ្នាំ២០២២ ថា ថៃរកឃើញករណីឆ្លងថ្មី នៃជំងឺកូវីដ-១៩ ចំនួន ២ ៩២៧នាក់ និង មានករណីស្លាប់ថ្មី១៨នាក់។ ថៃមានអ្នកឆ្លងសរុប ២ ២៣២ ៤៨៥នាក់ ហើយក្នុងនោះមានអ្នកស្លាប់ ២១ ៧៣៨នាក់ និង មានអ្នកជាសះស្បើយ ២ ១៧៧ ៦៣៣នាក់៕
