រាជធានីបាងកក៖ រហូតមកដល់ពេលនេះ មានការរកឃើញករណីឆ្លងវីរុសកូវីដ-១៩បំប្លែងខ្លួនថ្មីអូមីក្រុង (Omicron) ជាចង្កោម ចំនួន៤លើក ធ្វើឲ្យប្រទេសថៃ មានអ្នកឆ្លងវីរុសប្រភេទនេះ កើនឡើងដល់៦០នាក់ ខណៈ២០នាក់ផ្សេងទៀត កំពុងតែរង់ចាំលទ្ធផល ពីមន្ទីរពិសោធន៍។
បើតាមសារព័ត៌មានថៃ The Nation បានចេញផ្សាយ នៅថ្ងៃទី២១ ខែធ្នូ ឆ្នាំ២០២១ ថា មជ្ឈមណ្ឌលគ្រប់គ្រងស្ថានភាពកូវីដ-១៩ ហៅកាត់ «CCSA» បានបញ្ជាក់ កាលពីថ្ងៃចន្ទ ទី២០ ខែធ្នូ ថា រហូតមកដល់ពេលនេះ ថៃបានរកឃើញការឆ្លងវីរុស Omicron ជាចង្កោម ចំនួន៤លើក។
លោកស្រីវេជ្ជបណ្ឌិត Sumanee Watcharasin អ្នកនាំពាក្យរង នៃ CCSA បានបញ្ជាក់ កាលពីថ្ងៃទី២០ ខែធ្នូ ថា ការឆ្លងជាចង្កោមលើកទី១ ត្រូវបានរាយការណ៍ ដោយការិយាល័យសាធារណសុខាភិបាលស្រុក Nonthaburi ខេត្ត Nonthaburi ។ ករណីនេះមានការជាប់ពាក់ព័ន្ធនឹងខេត្ត Pathum Thani, Ayutthaya, Nakhon Ratchasima និង ទីក្រុងបាងកក។
លោកស្រីវេជ្ជបណ្ឌិត Sumanee Watcharasin អ្នកនាំពាក្យរង និង ក៏ជាប្រធានការិយាល័យទំនាក់ទំនងហានិភ័យ និងអភិវឌ្ឍន៍ឥរិយាបថសុខភាព នៃនាយកដ្ឋានគ្រប់គ្រងជំងឺ បានបន្ថែមថា «ក្រុមនេះមានគ្នា៣១នាក់ បានទៅដើរលេង នៅក្នុងប្រទេសអារ៉ាប៊ីសាអូឌីត ដើម្បីចូលរួមពិធីសាសនា កាលពីដើមខែធ្នូ ឆ្នាំ២០២១។ ពួកគេបានវិលត្រឡប់ មកកាន់ប្រទេសថៃវិញ កាលពីថ្ងៃទី១៥ ខែធ្នូ ហើយពួកគេ១៤នាក់ ក្នុងចំណោមអ្នកទាំងនោះ បានធ្វើតេស្ដ រកឃើញវិជ្ជមាន។ ប៉ុន្ដែពីរថ្ងៃក្រោយមក មនុស្ស៤នាក់ទៀត បានរកឃើញ ថា ឆ្លងវីរុសដែរ។
លោកស្រីវេជ្ជបណ្ឌិត បានបន្ដថា ៦នាក់ ក្នុងចំណោមពួកគេទាំងនោះ បានរកឃើញឆ្លងវីរុសបំប្លែងខ្លួនថ្មី Omicron ខណៈ៨នាក់ផ្សេងទៀត ឆ្លងវីរុស Delta ។
ដោយឡែក ចង្កោមលើកទី២ ឆ្លងលើបុរសជនជាតិកូឡុំប៊ី និង ប្រពន្ធជាជនជាតិថៃ។ ពួកគេទាំង២នាក់ បានជិះយន្ដហោះ មកពីប្រទេសនីហ្សេរីយ៉ា កាលពីថ្ងៃទី២៦ ខែវិច្ឆិកា ហើយបានមកចុះ នៅក្នុងប្រទេសថៃ ដោយតេស្ដរកឃើញ នៅថ្ងៃទី១០ ខែធ្នូ។
ចង្កោមទី៣ ត្រូវបានរាយការណ៍ នៅក្នុខេត្ត Narathiwat ខណៈមនុស្ស៣នាក់ ក្នុងចំណោមអ្នកវិលត្រឡប់ មកពីមជ្ឈិមបូព៌ា រកឃើញវិជ្ជមានពីកូវីដ-១៩។ ពួកគេទាំង៣នាក់នោះ មានម្នាក់ ឆ្លងអូមីក្រុង និង២នាក់ឆ្លង Delta ។ រីឯមនុស្ស៤នាក់ប៉ះពាល់ផ្ទាល់ និង១២៦នាក់ ប៉ះពាល់ប្រយោល។
ចង្កោមទី៤ ជាជនជាតិថៃ និងជនជាតិបរទេស ៧នាក់ បានចូលមកកាន់ប្រទេសថៃ ចន្លោះពីថ្ងៃទី១៣ និង១៦ ខែធ្នូ តាមខេត្ត Samui និង Phuket ហើយតេស្ដរកឃើញវិជ្ជមាន ពេលមកដល់។ ពួកគេទាំង៧នាក់ រកឃើញឆ្លង Omicron ។
នាយកដ្ឋានវិទ្យាសាស្ត្រវេជ្ជសាស្រ្ត បានប្រកាស កាលពីថ្ងៃចន្ទ ទី២០ ខែធ្នូ ថា ថៃបានរកឃើញ Omicron កើនដល់៦៣ករណី ហើយ២០នាក់ផ្សេងទៀត កំពុងរង់ចាំការបញ្ជាក់លទ្ធផល ពីមន្ទីរពិសោធន៍៕