រដ្ឋធានីប៉េកាំង៖ តារាស្រី Huang Wei វ័យ៣៦ឆ្នាំ ដែលគេស្គាល់ថា នាង Viya ជាតារាអ៊ិនធើរណេតដ៏ល្បីល្បាញមួយរូប ត្រូវបានអាជ្ញាធរទីក្រុង Hangzhou ខេត្ត Zhejiang ប្រទេសចិន ពិន័យជាទឹកប្រាក់ ១,៣៤ពាន់លានយ័ន (លុយចិន) ឬស្មើនឹង ២១០លានដុល្លារសហរដ្ឋអាមេរិក។
សារព័ត៌មាន BBC បានចេញផ្សាយ កាលពីរាត្រី ថ្ងៃទី២១ ខែធ្នូ ឆ្នាំ២០២១ ថា កំពូលតារាអ៊ិនធើរណេត ជាជនជាតិចិនដ៏ល្បីល្បាញមួយរូប (Live-Streamer) ត្រូវបានផាកពិន័យ ចំនួន២១០លានដុល្លារសហរដ្ឋអាមេរិក ពីការលាក់បាំងប្រាក់ចំណូលរបស់នាង។ អ្នកស្រី Huang Wei ដែលគេស្គាល់ថា Viya ជាតារាអ៊ិនធើរណេតដ៏ល្បីល្បាញមួយរូប មានអ្នក Follow រហូតដល់១០លាននាក់ ហើយអ្នកស្រីប្រើប្រាស់ផ្លេតហ្វមរបស់នាង (Platform) ដើម្បីលក់ផលិតផលផ្សេងៗ នៅតាមអនឡាញ។
អាជ្ញាធរទីក្រុង Hangzhou បានចោទប្រកាន់អ្នកស្រី Huang Wei ពីការលាក់បាំងប្រាក់ចំណូលផ្ទាល់ខ្លួន ក៏ដូចជា បទល្មើសហិរញ្ញវត្ថុផ្សេងៗទៀត ដែលបានប្រពឹត្ដ នៅចន្លោះពីឆ្នាំ២០១៩ និង២០២០។
បើតាមគណនីបណ្ដាញសង្គម Weibo របស់អ្នកស្រី Huang Wei បានសរសេរថា «ខ្ញុំសូមទទួលស្គាល់ទាំងស្រុងនូវការដាក់ពិន័យ ដែលបានធ្វើឡើង ដោយអាជ្ញាធរពន្ធដារ»។
អ្នកស្រី Huang Wei វ័យ៣៦ឆ្នាំ ក្លាយជាតារាអ៊ិនធើរណេតដ៏ល្បីល្បាញបំផុតមួយរួប នៅក្នុងប្រទេសចិន ហើយអ្នកស្រីត្រូវបានគេស្គាល់ថា ជារាជិនី Livestreaming ។ តាមរយៈភាពល្បីល្បាញនេះ ធ្វើឲ្យអ្នកស្រីអាចធ្វើពាណិជ្ជកម្មបានគ្រប់បែបយ៉ាង នៅលើអនឡាញ (Taobao Platform) រហូតធ្វើឲ្យអ្នកស្រី រកប្រាក់ចំណូលបានយ៉ាងច្រើនបំផុតផងដែរ៕