បងម្នាក់ៗចាក់សាក់មិនតូចទេ ! អាចនិយាយបានថា ជាប្រុសដើមទ្រូង៥ហត្ថ ទាស់ត្រង់ឃើញរថយន្តគេទុកនៅកន្លែងស្ងាត់មិនបាន

រាជធានីភ្នំពេញ ៖ ជនសង្ស័យ២នាក់ ជិះរថយន្តកាមរី ដើរលួចស្លាកលេខរថយន្ត នៅចំណុចមាត់ប្រឡាយទឹកស្អុយ ផ្លូវបេតុង ភូមិមានជ័យ១ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ ត្រូវបានកម្លាំងនគរបាលខណ្ឌមានជ័យឃាត់ខ្លួន កាលពីថ្ងៃទី២៦ ខែវិច្ឆិកា ឆ្នាំ២០២១ វេលាម៉ោង០៣ម៉ោង៣០នាទីទៀបភ្លឺ ។
សមត្ថកិច្ច បានឲ្យដឹងថា ជនសង្ស័យទី១-ឈ្មោះ វ៉ង់ ខ័ណ្ឌដែន ភេទ ប្រុស អាយុ ៣៦ ឆ្នាំ ជនជាតិ ខ្មែរ ទីលំនៅផ្ទះជួល ផ្លូវ លំ ភូមិ ព្រែកតានូ សង្កាត់ ចាក់អង្រែលើ ខណ្ឌមានជ័យ រាជធានីភ្នំពេញ មុខរបរ មិនពិតប្រាកដ ។ ទី២- ឈ្មោះ សុខ រ៉ា ហៅ ណូ ភេទប្រុស អាយុ៣៥ឆ្នាំ ជនជាតិ ខ្មែរ ទីលំនៅផ្ទះគ្មានលេខ ផ្លូវ លំ សង្កាត់- ខណ្ឌដង្កោ រាជធានីភ្នំពេញ មុខរបរ មិនពិតប្រាកដ ។ ដកហូត អាវដៃវែង ពណ៌ទឹកប៊ិក មានសក្តិ, មានសញ្ញាស៊ីង អ.ហ ចំនួន០២, មានឡូហ្គោអក្សរកងរាជអាវុធហត្ថចំនួន ០១, ទូរស័ព្ទដៃចាស់ ០១ គ្រឿង ពណ៌ខ្មៅ លេខស៊ីមកាត ០១០ ៩១៧ ៩៧៧, កាបូបស្ពាយ ពណ៌លឿង ចំនួន០១ គ្រឿង, ស្លាកលេខរថយន្តចំនួន០៨ បន្ទះ(ភ្នំពេញ ២BK-១៦០៥ ចំនួន ០២ បន្ទះ, ភ្នំពេញ ២AB-៦៧២២ ចំនួន ០២ បន្ទះ, ភ្នំពេញ ២BI-៥៨៤៥ ចំនួន ០១ បន្ទះ, ភ្នំពេញ ២AI-៦១០៨ ចំនួន ០១ បន្ទះ និងនគរបាល ២-១៤៥២ ចំនួន ០២ បន្ទះ), ប័ណ្ណសម្គាល់យានយន្តចំនួន ០២ សន្លឹក និងទុលឡឺវីសចំនួន ០២ (របស់ជនសង្ស័យ) ។ ចំណែករថយន្ត ០១ គ្រឿងម៉ាក កាមរី ពណ៌ ស ពាក់ស្លាកលេខ ស្វាយរៀង ២A-១៩០៨ លេខតួ=៤T១BB៤៦K៧៩៤០៨២៤៩១ លេខម៉ាស៊ីន=៤T១BB៤៦K៧៩៤០៨២៤៩១ ខាងលើមានភាពមិនប្រក្រតី។
ជនសង្ស័យ ត្រូវកម្លាំងសមត្ថកិច្ចនាំទៅកាន់អធិការដ្ឋាននគរបាលខណ្ឌមានជ័យ ដើម្បីធ្វើការស្រាវជ្រាវបន្ត ដោយមានការឯកភាពពីលោកស្រី សុង ឆវ័ន្ត ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ និងកសាងសំណុំរឿងចាត់ជនសង្ស័យទាំង២នាក់ តាមនីតិវិធី៕