រដ្ឋធានីវ៉ាស៊ីនតោន៖ ក្រោយការផ្ទុះជម្លោះការទូតយ៉ាងខ្លាំង រវាងរដ្ឋាភិបាលទីក្រុងវ៉ាស៊ីនតោន និង ប៉ារីស ជុំវិញកិច្ចព្រមព្រៀងសន្ដិសុខថ្មី ហៅកាត់ «Aukus» ដែលធ្វើឲ្យប៉ះពាល់ដល់កុងត្រាសាងសង់នាវាមុជទឹក មានតម្លៃ៣៧ពាន់លានដុល្លារសហរដ្ឋអាមេរិក ជាមួយបារាំងនោះ ប៉ុន្ដែរហូតមកដល់ពេលនេះ ជម្លោះការទូត រវាងមហាអំណាចជាសម្ពន្ធមិត្តនឹងគ្នានោះ បានរលត់ទៅវិញហើយ ក្រោយពេលប្រធានាធិបតី ចូ បៃដិន បានចរចាតាមទូរស័ព្ទជាមួយនឹងលោក ម៉ាក្រុង កាលពីថ្ងៃទី២២ ខែកញ្ញា ឆ្នាំ២០២១ (វេលានៅរដ្ឋធានីវ៉ាស៊ីនតោន)។
សារព័ត៌មាន BBC បានផ្សាយ នៅថ្ងៃទី២៣ ខែកញ្ញា ថា បារាំង និងសហរដ្ឋអាមេរិក កំពុងតែខិតខំប្រឹងប្រែងបញ្ចប់ជម្លោះ ក្រោយពេលមានកិច្ចព្រមព្រៀងសន្ដិសុខថ្មី (Aukus) ដែលត្រូវបានបង្កើឡើង ដោយសហរដ្ឋអាមេរិក ចក្រភពអង់គ្លេស និង អូស្រ្ដាលី កាលពីថ្ងៃទី១៦ ខែកញ្ញា ឆ្នាំ២០២១។ កិច្ចព្រមព្រៀង Aukus នេះ បានធ្វើឲ្យប៉ះពាល់ដល់កិច្ចព្រមព្រៀង រវាងអូស្រ្ដាលី និងបារាំង ក្នុងការសាងសង់នាវាមុជទឹក មានតម្លៃ៣៧ពាន់លានដុល្លារ សម្រាប់កងទ័ពជើងទឹកអូស្ត្រាលី។
លោកស្រី ចេន ផ្សាគី (Jen Psaki) អ្នកនាំពាក្យ សេតវិមាន បានប្រាប់ក្រុមអ្នកសារព័ត៌មាន ថា កិច្ចសន្ទនាតាមទូរស័ព្ទ រវាងមេដឹកនាំសហរដ្ឋអាមេរិក និងបារាំង បានប្រព្រឹត្តទៅ អស់រយៈពេល៣០នាទី ដើម្បីដោះស្រាយ ជុំវិញបញ្ហារកាំរកូស កាលពីមួយសប្តាហ៍កន្លងមកនេះ។ រីឯបញ្ហាមួយចំនួន ត្រូវបានដោះស្រាយរួចរាល់ហើយ។ លោក ចូ បៃដិន ប្រធានាធិបតីសហរដ្ឋអាមេរិក និងលោក អែមម៉ាញែល ម៉ាក្រុង ប្រធានាធិបតីបារាំង បានព្រមព្រៀងគ្នា ក្នុងការពិគ្រោះយោបល់ស៊ីជម្រៅ ដើម្បីកសាងទំនុករវាងគ្នាឡើងវិញ។ មេដឹកនាំទាំងពីរ បានយល់ព្រមជួបគ្នា ដោយផ្ទាល់ ក្នុងកិច្ចប្រជុំមួយ នៅសហភាពអឺរ៉ុប ដែលនឹងប្រព្រឹត្តទៅ នៅក្នុងខែតុលា ឆ្នាំ២០២១។
ក្រោយពេលសម្របសម្រួលត្រូវរ៉ូវគ្នាឡើងវិញ លោក ហ្វីលីព អេត្យែន (Philippe Etienne) ឯកអគ្គរដ្ឋទូតបារាំង ដែលត្រូវលោក ម៉ាក្រុង កោះហៅឲ្យត្រឡប់មកប្រទេសកំណើតវិញ កាលពីសប្តាហ៍មុននោះ ក៏នឹងត្រូវបញ្ជូនត្រឡប់ទៅកាន់ទីក្រុងវ៉ាស៊ីនតោនវិញផងដែរ។ ដោយឡែក បញ្ហាជម្លោះការទូតជាមួយអូស្ត្រាលី ក៏នៅតែមិនទាន់ បានបញ្ជាក់នៅឡើយ។
លោក បូរីស ចនសុន (Boris Johnson) នាយករដ្ឋមន្ត្រីចក្រភពអង់គ្លេស បានថ្លែងទៅកាន់មេដឹកនាំបារាំង មុនជំនួបជាមួយលោក ចូ បៃដិន សូមឲ្យ «អត់ធ្មត់បន្តិច» និងទុកឱកាសដល់សម្ពន្ធមិត្ត ដូចជា អង់គ្លេស អាមេរិក និងអូស្ត្រាលី បានធូរស្រាលអារម្មណ៍ ពីបញ្ហាប្រឈមមុខនឹងជម្លោះដ៏តានតឹង ទៅលើកិច្ចសន្យាផលិតនាវាមុជទឹក ដើរដោយថាមពលនុយក្លេអ៊ែរ ដែលនាំឲ្យបារាំង ខាតបង់រាប់សិបពាន់លានដុល្លារនោះសិន។
សូមជម្រាបថា កិច្ចព្រមព្រៀងសន្តិសុខត្រីភាគីថ្មី ហៅកាត់ AUKUS នេះ ត្រូវបានបង្កើនឡើង ដោយសហរដ្ឋអាមេរិក ចក្រភពអង់គ្លេស និងប្រទេសអូស្ត្រាលី ដើម្បីទប់ទល់នឹងឥទ្ធិពលចិន ដែលកំពុងតែកើនឡើង នៅក្នុងសមុទ្រចិនខាងត្បូង។ បើតាមកិច្ចព្រមព្រៀងនេះ សហរដ្ឋអាមេរិក និងចក្រភពអង់គ្លេស បានសន្យាផ្តល់បច្ចេកវិទ្យាដល់អូស្ត្រាលី ក្នុងការផលិតនាវាមុជទឹកដើរដោយថាមពលនុយក្លេអ៊ែរ ទើបរដ្ឋាភិបាលកង់បេរ៉ាលុបចោលកុងត្រា សាងសង់នាវាមុជទឹក មានតម្លៃ៣៧លានដុល្លារ ជាមួយបារាំង រហូតធ្វើឲ្យបារាំង ខឹងសម្បាយ៉ាងខ្លាំងបែបនេះ៕