រដ្ឋធានីវ៉ាស៊ីនតោន៖ ក្រោយពេលក្មួយស្រីបង្កើត និង សារព័ត៌មាន New York Times បានទម្លាយការសម្ងាត់ ពីទ្រព្យសម្បត្ដិគ្រួសាររបស់លោក ដូណាល់ ត្រាំ រហូតនាំឲ្យឈានដល់ការបង់ពន្ធអស់១០០លានដុល្លារនោះមក ធ្វើឲ្យអតីតប្រធានាធិបតីសហរដ្ឋអាមេរិក បានខឹងសម្បាយ៉ាងខ្លាំង ហើយប្ដឹងចោទប្រកាន់ដល់ពួកគេ ពីបទ «គ្រោងការណ៍អាក្រក់» ដើម្បីទទួលបានកំណត់ត្រាពន្ធនេះ។
សារព័ត៌មាន Al Jazeera បានចេញផ្សាយ កាលពីថ្ងៃទី២២ ខែកញ្ញា ឆ្នាំ២០២១ ថា លោក ដូណាល់ ត្រាំ អតីតប្រធានាធិបតីសហរដ្ឋអាមេរិក បានដាក់ពាក្យបណ្តឹង ប្រឆាំងនឹងក្មួយស្រីរបស់គាត់ ឈ្មោះ ម៉ារី ត្រាំ (Mary Trump) និង កាសែតញូវយ៉កថាមស៍ (The New York Times) ពាក់ព័ន្ធនឹងរឿងរាយការណ៍លើពន្ធ១០០លានដុល្លារសហរដ្ឋអាមេរិក។ រឿងក្ដីនោះ លោក ត្រាំ បានចោទប្រកាន់ក្មួយស្រ្ដីរបស់គាត់ និង កាសែតញូវយ៉កថាមស៍ ពីការចូលរួម ក្នុង «ផែនការមិនពិត» សម្រាប់ជំរុញឲ្យគាត់បង់ពន្ធ នៅក្នុងករណីស៊ើបអង្កេតមួយ លើហិរញ្ញវត្ថុរបស់គាត់ ដើម្បីទទួលបានពានរង្វាន់ Pulitzer ។
រឿងក្ដីប្រាក់១០០លានដុល្លារនេះ បានដាក់ពាក្យបណ្ដឹងទៅកាន់ Dutchess County, រដ្ឋញូវយ៉ក សហរដ្ឋអាមេរិក កាលពីថ្ងៃទី២១ ខែកញ្ញា ឆ្នាំ២០២១។ នៅក្នុងពាក្យបណ្ដឹងនោះ បានរៀបរាប់ ពីឈ្មោះអ្នករាយការណ៍ព័ត៌មានរបស់សារព័ត៌មាន New York Times រួមមាន Susanne Craig, David Barstow និង Russ Buettner ហើយពួកគេទាំង៣នាក់នេះ បានជាប់ពាក់ព័ន្ធនឹងកិច្ចការ ធ្វើឲ្យទទួលបានកំណត់ត្រាពន្ធសម្ងាត់របស់គ្រួសារលោក ដូណាល់ ត្រាំ។
ពាក្យបណ្តឹងនោះ បានរៀបរាប់ថា «ចុងចោទបានចូលរួម ក្នុងគម្រោងលាក់កំបាំង ដើម្បីទទួលបានកំណត់ត្រាសម្ងាត់ និងរឿងរសើបបំផុត ដែលពួកគេបានកេងប្រវ័ញ្ច សម្រាប់ផលប្រយោជន៍ផ្ទាល់ខ្លួន និងប្រើប្រាស់ជាមធ្យោបាយ នៃការធ្វើឱ្យស្របច្បាប់នូវការងារសាធារណៈរបស់ពួកគេ»។
សារព័ត៌មាន New York Times បានរាយការណ៍ថា លោក ដូណាល់ ត្រាំ ទទួលបានលុយជាង៤០០លានដុល្លារសហរដ្ឋអាមេរិក តាមលក្ខខណ្ឌទាន់សម័យ ពីអាណាចក្រអចលនទ្រព្យរបស់ឪពុករបស់គាត់ ភាគច្រើន តាមរយៈគម្រោងបន្លំពន្ធ។ ចំណែកលោកស្រី Mary Trump ជាកូនស្រីបង្កើតរបស់លោក Fred Trump Jr ត្រូវជាបងប្រុសច្បងរបស់លោក ដូណាល់ ត្រាំ ដែលបានស្លាប់ កាលពីអំឡុងឆ្នាំ១៩៨១ ដោយសារផលវិបាក ពីការសេពគ្រឿងស្រវឹង។
ជាមួយគ្នានេះ សារព័ត៌មាន New York Times និងអ្នកកាសែត៣នាក់ បានឈ្នះរង្វាន់ Pulitzer នៅឆ្នាំ២០១៩ ជុំវិញការស៊ើបអង្កេត លើហិរញ្ញវត្ថុរបស់គ្រួសារលោក ដូណាល់ ត្រាំ អតីតប្រធានាធិបតីសហរដ្ឋអាមេរិក។ គណៈកម្មាធិការរង្វាន់ Pulitzer បានបញ្ជាក់ ដោយសំអាងលើការអះអាងរបស់គាត់ អំពីទ្រព្យសម្បត្តិ ដែលធ្វើឡើង ដោយខ្លួនឯង និងបង្ហាញ ពីអាណាចក្រជំនួញពោរពេញទៅដោយការគេចពន្ធ»៕
