រដ្ឋធានីម៉ានីល៖ ក្រោយពេលស្ដេចប្រដាល់ពិភពលោក ម៉ានី ប៉ាក់គីអាវ ប្រកាសឈរឈ្មោះ ប្រកួតប្រជែងតំណែងប្រធានាធិបតីហ្វីលីននោះមក ស្រាប់តែពេលនេះ តួកុនដ៏ល្បីល្បាញម្នាក់របស់ប្រទេសនេះ ហើយបច្ចុប្បន្នមានតួនាទីជាអភិបាលក្រុងម៉ានីន ក៏បានសម្រេចចិត្តឈរឈ្មោះ ចូលរួមប្រកួតប្រជែង ដណ្ដើមតំណែងកំពូលនេះ នៅក្នុងការបោះឆ្នោត នាឆ្នាំ២០២២ខាងមុនេះ ដោយលោកបានចោទ ប្រកាន់ប្រធានាធិបតី Duterte ពីការបរាជ័យ នៅក្នុងការទប់ស្កាត់នឹងជំងឺកូវីដ-១៩ និងអំពើពុករលួយ។
សារព័ត៌មាន Al Jazeera បានផ្សាយ កាលពីថ្ងៃទី២២ ខែកញ្ញា ថា លោក Isko Moreno អភិបាលក្រុងម៉ានីល និងជាតារាភាពយន្ដផងនោះ បានសម្រេចចិត្តឈរឈ្មោះ ជាបេក្ខភាពប្រធានាធិបតីហ្វីលីពី សម្រាប់ការបោះឆ្នោតជាតិ នៅឆ្នាំ២០២២។ អភិបាលក្រុង បានសន្យា ប្រយុទ្ធប្រឆាំងនឹងភាពក្រីក្រ ហើយលោកក៏បានវាយប្រហារ សម្ដៅទៅលើអតីតសម្ពន្ធមិត្តរបស់លោក គឺលោក រ៉ូឌ្រីហ្គោ ឌូទើរតេ (Rodrigo Duterte) ប្រធានាធិបតីហ្វីលីពីន ពីការបរាជ័យ នៅក្នុងការទប់ស្កាត់ការរាតត្បាតពីជំងឺកូវីដ-១៩ និង អំពើពុករលួយ។
រដ្ឋធម្មនុញ្ញហ្វីលីពីន បានរារាំងដល់លោក Duterte ក្នុងការឈរឈ្មោះជាបេក្ខភាពប្រធានាធិបតី នៅក្នុងអាណត្ដិទី២របស់គាត់។ ប៉ុន្ដែទោះជាយ៉ាងណាក្ដី លោក Duterte អាចមានសិទ្ធិឈរឈ្មោះ ក្នុងតំណែងជាអនុប្រធានាធិបតីបាន។ ហ្វីលីពីន បានកំណត់ពេលបោះឆ្នោតប្រធានាធិបតី នៅខែឧសភា ឆ្នាំ២០២២ ខាងមុខនេះ៕