បុរីញូវយ៉ក៖ ក្រោយពេលផ្ដួលរំលំរដ្ឋាភិបាលរបស់លោក Ashraf Ghani ប្រធានាធិបតីអាហ្វហ្គានីស្ថាន កាលពីថ្ងៃទី១៥ ខែសីហា ឆ្នាំ២០២១ ហើយបានបង្កើតរដ្ឋាភិបាលថ្មីនោះមក តាលីបង់ បានស្នើសុំថ្លែងទៅកាន់មេដឹកនាំរបស់ពិភពលោក នៅឯមហាសន្និបាតរបស់អង្គការសហប្រជាជាតិ នៅក្នុងបុរីញូវយ៉ក សហរដ្ឋអាមេរិក នៅក្នុងសប្ដាហ៍នេះ ប៉ុន្ដែទំនងជាមិនអាចទៅរួចឡើយ។
សារព័ត៌មាន BBC បានចេញផ្សាយ ថ្ងៃទី២២ ខែកញ្ញា ឆ្នាំ២០២១ ថា រដ្ឋមន្រ្ដីក្រសួងការបរទេសតាលីបង់ កាលពីថ្ងៃទី២០ ខែកញ្ញា ឆ្នាំ២០២១ បានសរសេរលិខិតមួយច្បាប់ ស្នើទៅកាន់អង្គការសហប្រជាជាតិ ដើម្បីសុំឲ្យពួកគេមានតំណែងប្រចាំនៅក្នុងអង្គការកំពូលរបស់ពិភពលោកមួយនេះ។ ប៉ុន្ដែគណៈកម្មាធិការអង្គការសហប្រជាជាតិ នឹងត្រួតពិនិត្យមើលសំណើរបស់តាលីបង់។
តាលីបង់ ក៏បានស្នើសុំ តែងតាំងលោក Suhail Shaheen ជាអ្នកនាំពាក្យរបស់ពួកគេ ដែលមានមូលដ្ឋាន ប្រចាំនៅទីក្រុងដូហា ប្រទេសកាតារ ក្លាយជាឯកអគ្គរដ្ឋទូតអាហ្វហ្គានីស្ថាន ប្រចាំនៅអង្គការសហប្រជាជាតិ។ តាលីបង់ បានអះអាងថា ប្រេសិតរបស់រដ្ឋាភិបាលរបស់លោក Ashraf Ghani ដែលត្រូវបានបណ្ដេញចេញពីតំណែង នឹងមិនមែនជាតំណាងឲ្យប្រទេសអាហ្វហ្គានីស្ថាន បន្ដទៀតឡើយ។
បើយោងតាមអ្នកនាំពាក្យ អង្គការសហប្រជាជាតិម្នាក់ បានថ្លែងថា សំណើរបស់តាលីបង់ ដើម្បីចូលរួម នៅក្នុងកិច្ចពិភាក្សាកម្រិតខ្ពស់នេះ កំពុងតែលើកយកមកពិចារណា ដោយគណៈកម្មាធិការអង្គការសហប្រជាជាតិ ដែលមានសមាជិក ចំនួន៩រូប រួមមាន សហរដ្ឋអាមេរិក ចិន និងរុស្ស៊ី…ជាដើម។ ប៉ុន្ដែករណីនេះ តាលីបង់ ទំនងជាមិនអាចបានចូលរួមជួបកិច្ចប្រជុំនេះ មុនពេលបញ្ចប់សម័យប្រជុំមហាសន្និបាតអង្គការសហប្រជាជាតិ នៅថ្ងៃទី២៧ ខែកញ្ញា ឆ្នាំ២០២១នោះឡើយ។ ទោះជាយ៉ាងណា រហូតមកដល់ពេលនេះ បើតាមច្បាប់របស់អង្គការសហប្រជាជាតិ លោក Ghulam Isaczai ដែលត្រូវបានតែងតាំងដោយលោក Ashraf Ghani ប្រធានាធិបតីអាហ្វហ្គានីស្ថាន ត្រូវបានតាលីបង់ បណ្ដេញចេញពីអំណាចនោះ ក៏នឹងនៅតែជាឯកអគ្គរដ្ឋទូតអាហ្វហ្គានីស្ថាន ប្រចាំនៅអង្គការសហប្រជាជាតិ ដដែល។
លោក Ghulam Isaczai ត្រូវបានគេរំពឹងថា គាត់នឹងថ្លែងសុន្ទរកថាទៅកាន់អង្គការសហប្រជាជាតិ នៅថ្ងៃទី២៧ ខែកញ្ញា ឆ្នាំ២០២១ ដែលជាថ្ងៃចុងបញ្ចប់ នៃមហាសន្និបាតរបស់អង្គការកំពូលរបស់ពិភពលោក បើទោះជាតាលីបង់ បានអះអាងថា «បេសកកម្មរបស់គាត់ មិនមែនជាតំណាងឲ្យប្រទេសអាហ្វហ្គានីស្ថនាក្ដី»៕
