រដ្ឋធានីលីម៉ា៖ រថយន្ដក្រុងមួយគ្រឿង បានបើកធ្លាក់ពីលើច្រាំងជ្រលងភ្នំ បណ្ដាលឲ្យមនុស្សយ៉ាងតិច៣២នាក់បាត់បង់ជីវិត កាលពីថ្ងៃទី៣១ ខែសីហា នៅត្រង់ចំណុចចំណោត Andes មានចម្ងាយប្រហែល៦០គីឡូម៉ែត្រ នាភាគខាងកើត រដ្ឋធានីលីម៉ា (Lima) ប្រទេសប៉េរូ។
មន្រ្ដីប៉ូលិស ក្នុងតំបន់ បានបញ្ជាក់ថា នៅក្នុងឧប្បត្ដិហេតុគ្រោះថ្នាក់ចរាចរណ៍រថយន្ដបើកធ្លាក់ពីលើច្រាំងភ្នំនេះ បានបណ្ដាលឲ្យមនុស្សយ៉ាងតិច៣២នាក់បាត់បង់ជីវិត ហើយក្នុងនោះមានកុមារ២នាក់ផងដែរ។ ដោយឡែកមនុស្សជាង២០នាក់ផ្សេងទៀត បានរងរបួស។
មន្រ្ដីប៉ូលិសដដែល បានបន្ថែមថា ករណីនេះ ជាគ្រោះថ្នាក់ចរាចរណ៍លើកទី៣ ដែលបានបណ្ដាលឲ្យមនុស្សជាច្រើននាក់ស្លាប់ ក្នុងរយៈពេល៤ថ្ងៃកន្លងមកនេះ នៅត្រង់ចំណុចផ្លូវច្រាំងចំណោតភ្នំ Andes ។ ហេតុការណ៍ដ៏អាក្រក់នេះ បានកើតឡើង នៅត្រង់ចំណុចផ្លូវតូចមួយ នៃផ្លូវទៅកាន់ Carretera ដែលមានចម្ងាយ៦០គីឡូម៉ែត្រ នាភាគខាងកើត នៃរដ្ឋធានីលីម៉ា ហើយក៏ជាផ្លូវតភ្ជាប់ពីទីក្រុងលីម៉ាទៅកាន់តំបន់ជាច្រើន នៅកណ្ដាលភ្នំ Andes ផងដែរ។
លោក Cesar Cervantes ស្នងការប៉ូលិស បានបញ្ជាក់ថា ក្នុងចំណោមអ្នកបាត់បង់ជីវិតទាំង៣២នាក់ នៅក្នុងឧប្បត្ដិហេតុគ្រោះថ្នាក់ចរាចរណ៍នោះ មានកុមារ២នាក់ ហើយក្នុងនោះមានក្មេងប្រុស អាយុ៦ឆ្នាំម្នាក់ និងក្មេងស្រីអាយុ៣ឆ្នាំម្នាក់។ ដោយឡែករថយន្ដនេះ បានដឹកអ្នកដំណើរ ចំនួន៦៣នាក់។
លោកស្នងការប៉ូលិស បានបន្ថែមថា បើតាមអ្នកនៅរស់រានមានជីវិត បានប្រាប់ថា មុនពេលកើតហេតុនោះ រថយន្ដបានបើក នៅក្នុងល្បឿនលឿន។ លុះមកដល់ចំណុចកើតហេតុ រថយន្ដបានកិតដុំថ្មមួយ ធ្វើឲ្យរថយន្ដក្រឡាច់ចង្កូត រេខុសផ្លូវ ធ្លាក់ពីលើច្រាំងចំណោតភ្នំ ដែលមានកម្ពស់២០០ម៉ែត្រតែម្ដង។
ប្រទេសប៉េរ៉ូ កាលពីថ្ងៃទី២៩ ខែសីហា ឆ្នាំ២០២១ មានហេតុការណ៍ដ៏អាក្រក់ចំនួន២ករណី បានកើតឡើង ដោយសារទូកចំនួន២គ្រឿង បានក្រឡាប់លិច នៅក្នុងទន្លេអាម៉ាហ្សូន ស្ថិតក្នុងទឹកដីរបស់ខ្លួន ដោយបានបណ្ដាលឲ្យមនុស្ស២២នាក់បាត់បង់ជីវិត។ ចំណែកសាកសពរបស់ជនរងគ្រោះមួយចំនួនទៀត នៅតែរកមិនទាន់ឃើញ នៅឡើយ។ ដោយឡែក ក្នុងរយៈពេល២ថ្ងៃ មុនមានហេតុការណ៍គ្រោះថ្នាក់ចរាចរណ៍ខាងលើនេះ ក៏មានរថយន្ដក្រុង២គ្រឿង បើកធ្លាក់ជ្រោះ នៅភាគអាគ្នេយ៍ នៃប្រទេសប៉េរូ បណ្ដាលឲ្យមនុស្ស១៧នាក់បាត់បង់ជីវិត៕
