រាជធានីភ្នំពេញ៖ នៅវេលាម៉ោងប្រមាណ១២ថ្ងៃត្រង់ ទី ០៣ ខែសីហានេះ អាជ្ញាធរ និងសមត្ថកិច្ចដាក់ខ្សែហ៊ុំព័ទ្ធជំុវិញផ្សារដើមគ ទាំងមូលតែម្ដង ដើម្បីចុះបិទខ្ទប់សារជាថ្មី ក្នុងគោលបំណងយកសំណាកលើអាជីវករទាំងអស់ បន្ទាប់ពីមានករណីអ្នកវិជ្ជមានកូវីដ១៩ បំប្លែងថ្មីដែលតា បានចូលផ្សារដើមគកន្លងមក ។
តាមព័ត៌មានឱ្យដឹងថា កន្លងអ្នកវិជ្ជមានមេរោគបំប្លែងថ្មីដែលតាដែលរកឃើញនៅសង្កាត់បឹងសាឡាង ខណ្ឌទួលគោកហើយឈានទៅបិទផ្លូវមួយចំនួននោះ បានចេញចូលទិញអីវ៉ាន់នៅផ្សារដើមគ ទើបអាជ្ញាធរ និងសមត្ថកិច្ចបិទផ្សារនេះ ដើម្បីយកសំណាកលើអាជីវករ ។
ទោះបីជាយ៉ាងណាក៏ដោយ ក៏គេពុំទាន់ដឹងថា អាជីវករទាំងនោះបានឆ្លងមេរោគប្រភេទដែលតា ឬយ៉ាងនោះទេ ដោយនៅវេលារសៀលនេះអាជ្ញាធរ និងគណៈកម្មការផ្សារកំពុងតែរៀបចំធ្វើរោង ដើម្បីយកសំណាក។
សូមជម្រាបថា គិតត្រឹមព្រឹកថ្ងៃទី០៣ ខែសីហា ឆ្នាំ២០២១ កម្ពុជារកឃើញអ្នកឆ្លងជំងឺកូវីដ១៩ សរុបចំនួន ៧៩,០៥១នាក់ ក្នុងនោះអ្នកជាសះស្បើយសរុបចំនួន ៧២,១៤៥នាក់ និងស្លាប់សរុបចំនួន ១,៤៧១នាក់៕
