រាជធានីបាងកក៖ ប៉ូលិសថៃបានចាប់ខ្លួនម្ចាស់ក្រុមហ៊ុនទិញផ្លែឈើ នាំចេញទៅកាន់ប្រទេសចិន ក្រោមការចោទប្រកាន់ពីការ «ក្លែងផ្លែទុរេន» ធ្វើឲ្យប៉ះពាល់ដល់កិត្ដិយសផ្លែទុរេនរបស់ថៃ នៅក្នុងទីផ្សាររបស់ពិភពលោក។
សារព័ត៌មាន The Nation បានចេញផ្សាយ នៅថ្ងៃទី២២ ខែមិថុនា ថា ម្ចាស់ក្រុមហ៊ុនប្រមូលទិញផ្លែឈើម្នាក់ នៅក្នុងខេត្ត Chanthaburi ត្រូវបានចាប់ខ្លួន ដោយប៉ូលិសស្រុក Muang Chanthaburi និងមជ្ឈមណ្ឌលស្រាវជ្រាវ និងអភិវឌ្ឍន៍កសិកម្ម Chanthaburi កាលពីថ្ងៃចន្ទ ទី២១ ខែមិថុនា។ សមត្ថកិច្ចបានចោទប្រកាន់ក្រុមហ៊ុន ពីការក្លែងវិញ្ញាបនបត្រ GAP និង GMP ដោយក្លែងផ្លែទុរេនរបស់វៀតណាម ទៅជាផ្លែទុរេនរបស់ថៃ សម្រាប់នាំចេញទៅកាន់ប្រទេសចិន។
លោក Alongkorn Polabutr ទីប្រឹក្សារដ្ឋមន្រ្ដីក្រសួងកសិកម្មថៃ បានថ្លែងថា «យើងបានស៊ើបអង្កេតទៅលើក្រុមហ៊ុនទិញផ្លែឈើ «Lung Tu Odd» ដែលមានទីតាំងនៅក្នុងឃុំ Khlong Narai ស្រុក Muang Chanthaburi ខេត្ដ Chanthaburi ហើយរកឃើញថា ក្រុមហ៊ុននេះបានប្រើប្រាស់វិញ្ញាបនបត្រ GAP និង GMP ក្លែងក្លាយ។ ក្រុមហ៊ុននេះបាននាំចូលទុរេនពីប្រទេសវៀតណាម ហើយដាក់ឈ្មោះជាទុរេនថៃ មុនពេលនាំចេញទៅកាន់ប្រទេសចិន។
ប្រភពព័ត៌មានដដែល បានបន្ដថា ការស៊ើបអង្កេតបឋមបង្ហាញថា ក្រុមហ៊ុននេះបាននាំចូលទុរេនទម្ងន់១៨តោន មកពីប្រទេសវៀតណាម ក្នុងតម្លៃ១គីឡូក្រាម ថ្លៃ៧០បាត(លុយថៃ) ឬស្មើនឹងមានតម្លៃជាង២ដុល្លារអាមេរិក ហើយមានគម្រោងនាំចេញទៅកាន់ប្រទេសចិន ដោយលក់ក្នុង១គីឡូក្រាម ថ្លៃ១៦០បាត ឬស្មើនឹង៥ដុល្លារអាមេរិក។
លោក Alongkorn Polabutr បានបន្ថែមថា លោក Chalermchai Srion រដ្ឋមន្រ្ដីក្រសួងកសិកម្មបានបញ្ជាដល់នាយកដ្ឋានកសិកម្ម ត្រូវធ្វើការជាមួយនឹងប៉ូលិស, នាយកដ្ឋានគយ, នាយកដ្ឋានពាណិជ្ជកម្មអន្ដរជាតិ និងនាយកដ្ឋានស៊ើបអង្កេតពិសេស ដើម្បីស៊ើបអង្កេតបន្ដទៀតទៅលើបណ្ដាញរបស់ក្រុមហ៊ុន ក៏ដូចជា ក្រុមហ៊ុនក្លែងបន្លំផ្លែឈើផ្សេងទៀត នៅក្នុងខេត្តនានា ដែលកំពុងដាំទុរេន ដើម្បីការពារដល់ការបង្ខួចកិត្តិយសទុរេនរបស់ថៃ នៅក្នុងទីផ្សាររបស់ពិភពលោក។ រីឯស្ថាប័នពាក់ព័ន្ធរបស់ក្រសួងកសិកម្មនឹងជួបប្រជុំគ្នា នៅក្នុងសប្ដាហ៍នេះ ដើម្បីពិភាក្សាគ្នា កំណត់ពីវិធានការនានា រារាំងដល់ការក្លែងបន្លំផ្លែឈើនេះ។
បើតាមស្ថិតិពីនាយកដ្ឋានគយ បានបង្ហាញថា នៅក្នុងឆ្នាំ២០២០ ថៃបាននាំចេញផ្លែទុរេនស្រស់ មានតម្លៃ៦៥,៦ពាន់លានបាត (លុយថៃ) ឬស្មើនឹងជាង២ពាន់លាន (២ ០៧៨ ៣១៨ ៩៧៨) ដុល្លារអាមេរិក, ពោលគឺកើនឡើង៤៤ភាគរយ បើធៀបនឹងឆ្នាំកន្លងមក។ ប្រទេសចិនជាទីផ្សារទុរេនដ៏ធំរបស់ថៃ ដោយរកចំណូលបាន ចំនួន៤៧,៧ពាន់លានបាត ឬស្មើនឹង ១,៥ពាន់លាន (១ ៥១១ ២១៦ ៦៩៦) ដុល្លារអាមេរិក ឬស្មើនឹង៧៣ភាគរយ នៃផ្លែទុរេននាំចេញសរុបរបស់ប្រទេសថៃ៕
