រាជធានីបាងកក៖ កងទ័ពជើងទឹកថៃ បានចាប់ខ្លួនជនជាតិវៀតណាម ចំនួន១០នាក់ ចូលទៅនេសាទ ដោយខុសច្បាប់ នៅក្នុងដែនទឹករបស់ខ្លួន កាលពីថ្ងៃទី២០ ខែមិថុនា ឆ្នាំ២០២១។
សារព័ត៌មាន The Nation បានចេញផ្សាយ កាលពីថ្ងៃទី២១ ខែមិថុនា ថា កងទ័ពជើងទឹក ក្រោមបញ្ជាការដ្ឋានអនុវត្ដច្បាប់ដែនសមុទ្រថៃ (Thai-MECC) បានចាប់ខ្លួនអ្នកនេសាទជាជនជាតិវៀតណាម ចំនួន១០នាក់ ដែលចូលនេសាទ ដោយខុសច្បាប់ នៅក្នុងដែនសមុទ្រ នៃខេត្ត Narathiwat ប្រទេសថៃ កាលពីថ្ងៃអាទិត្យ (ទី២០ ខែមិថុនា)។ ការចាប់ខ្លួនជនជាតិវៀតណាមខាងលើនេះ បានកើតឡើង ក្រោយពេលនាវាកងទ័ពជើងទឹកថៃបានរកឃើញទូកនេសាទរបស់ជនជាតិវៀតណាម ចំនួន២គ្រឿង ចូលនេសាទ ដោយខុសច្បាប់ ខណៈពួកគេកំពុងល្បាត នៅក្នុងដែនទឹក នាភាគខាងត្បូងប្រទេស។
ទូកនេសាទទាំងនោះ ត្រូវបានបញ្ជូនទៅកាន់កំពង់ផែ Narathiwat ហើយអ្នកនេសាទដែលត្រូវឃាត់ខ្លួនទាំងអស់ នឹងត្រូវធ្វើតេស្ដ ស្វែងរកកូវីដ-១៩ ដោយមន្ត្រីសុខាភិបាលក្នុងតំបន់ មុនពេលនាំទៅឃុំខ្លួន និងសាកសួរ នៅប៉ុស្តិ៍នគរបាល Mueang Narathiwat ។ រីឯអ្នកនេសាទទាំង១០នាក់នោះ ត្រូវប្រឈមមុខនឹងការចោទប្រកាន់ ក្រោមច្បាប់បទល្មើសនេសាទ៕
