បរទេស៖ ក្រោយពេលអង្គការសុខភាពពិភពលោក (WHO) បានទទួលស្គាល់វ៉ាក់សាំងរបស់ចិនទាំង២នោះរួចមក រដ្ឋាភិបាលទីក្រុងប៉េកាំង បានបង្កើនការផលិត និងផ្គត់ផ្គងដល់ពិភលោក រហូតដល់ជាង៣៥០លានដូស។
មន្រ្ដីជាន់ខ្ពស់ក្រសួងសុខាភិបាលចិន បានថ្លែង កាលពីថ្ងៃអាទិត្យ (ទី៦ ខែមិថុនា) ថា ចិនបានផ្ដល់វ៉ាក់សាំងបង្ការកូវីដ-១៩ ជាង៣៥០លានដូសដល់បណ្ដាប្រទេសនានា នៅលើពិភពលោក។ ជាមួយគ្នានេះ ចិនក៏កំពុងតែបង្កើនការផលិតវ៉ាក់សាំង ឲ្យកាន់តែច្រើនឡើងបន្ថែមទៀត សម្រាប់ផ្គត់ផ្គង់ដល់ប្រទេសផ្សេងៗ ជាពិសេស ប្រទេសកំពុងអភិវឌ្ឍ។
លោក Zeng Yixin អនុប្រធានគណៈកម្មការសុខាភិបាលជាតិចិន បានថ្លែងថា អាទិភាពលេខមួយ សម្រាប់ការប្រយុទ្ធនឹងការរាតត្បាត នៃវីរុសកូវីដ-១៩របស់ពិភពលោក ត្រូវតែពង្រីក និងពន្លឿនការចាក់វ៉ាក់សាំងឲ្យបានទ្រង់ទ្រាយធំ ដែលពឹងផ្អែកលើការជំរុញការផលិតវ៉ាក់សាំង និងជំរុញការប្រើប្រាស់។
លោកអនុប្រធានគណៈកម្មការសុខាភិបាល បានបញ្ជាក់ថា «បច្ចុប្បន្នចិនកំពុងបង្កើនការផលិតវ៉ាក់សាំង ដើម្បីធានាបាននូវយុទ្ធនាការ នៃការចាក់វ៉ាក់សាំងនេះឲ្យបានល្អប្រសើរ និងរលួនបំផុត។ ទន្ទឹមនឹងនេះចិនក៏បានផ្តល់ជំនួយដល់សហគមន៍អន្តរជាតិ ជាពិសេស ប្រទេសកំពុងអភិវឌ្ឍ» ។
យោងតាមគណៈកម្មការសុខាភិបាលជាតិចិន បានឲ្យដឹងថា ចិនបានយល់ព្រមតាមលក្ខខណ្ឌទីផ្សារ សម្រាប់វ៉ាក់សាំងចំនួន៤ប្រភេទ និងបានផ្តល់ការអនុញ្ញាត សម្រាប់ការប្រើប្រាស់ជាបន្ទាន់ ចំពោះបុគ្គល៣ប្រភេទ។ បើគិតត្រឹមថ្ងៃសៅរ៍ (ទី៥ ខែមិថុនា) វ៉ាក់សាំងប្រហែល ៧៦៣លានដូស ត្រូវបានផ្គត់ផ្គង់ នៅក្នុងប្រទេសចិន។
ទោះជាយ៉ាងណា លោកអនុប្រធានគណៈកម្មការសុខាភិបាល បានបន្ថែមថា វិធានការសុខាភិបាល ដូចជា ការពាក់ម៉ាស់ និងរក្សាគម្លាតសង្គម ក៏គួរតែត្រូវធ្វើរួមគ្នាជាមួយនឹងការចាក់សាំងផងដែរ។
រហូតមកដល់ពេលនេះ វ៉ាក់សាំងបង្ការកូវីដ-១៩របស់ចិន ចំនួន២ រួមមាន Sinovac និង Sinopharm ត្រូវបានទទួលស្គាល់ពីអង្គការសុខភាពពិភពលោក សម្រាប់ការប្រើប្រាស់ជាបន្ទាន់។ រីឯការទទួលស្គាល់របស់ WHO ក៏ជាការបើកភ្លើងខៀវឲ្យចិន អាចនាំវ៉ាក់សាំងរបស់ខ្លួនទៅកាន់ទីផ្សារពិភពលោកផងដែរ៕