រាជធានីបាងកក៖ ការិយាល័យគោលនយោបាយសារពើពន្ធ នៃក្រសួងហិរញ្ញវត្ថុថៃ ហៅកាត់ FPO បានជំរុញដល់គ្រឹះស្ថានផ្ដល់ប្រាក់កម្ចី ជួយបន្ធូរបន្ថយបន្ទុករបស់កូនបំណុល នៅក្នុងអំឡុងពេលរលកទី៣ នៃវីរុសកូវីដ-១៩នេះ។
លោកស្រី Kulaya Tantitemit អគ្គនាយក FPO និង ជាអ្នកនាំពាក្យក្រសួងហិរញ្ញវត្ថុថៃ បានថ្លែងថា រលកទី៣ នៃជំងឺកូវីដ-១៩នេះបានធ្វើឲ្យប៉ះពាល់ដល់សេដ្ឋកិច្ចយ៉ាងខ្លាំង ដោយជះឥទ្ធិពលទៅលើការងារ និងជីវភាពប្រចាំថ្ងៃរបស់ប្រជាពលរដ្ឋ។ ដូច្នេះលោកស្រីសូមជំរុញដល់ម្ចាស់បំណុលខ្នាតតូច ត្រូវតែជួយបន្ធូរបន្ថយដល់បន្ទុករបស់កូនបំណុល។
លោកស្រីអគ្គនាយក FPO បានបញ្ជាក់ថា វិធានការបន្ធូរបន្ថយបន្ទុករបស់កូនបំណុលទាំងនោះ រួមមាន៖ ១-កាត់បន្ថយចំនួនបង់ប្រាក់ ឬក៏ពង្រីកអំឡុងពេលសងរបស់កូនបំណុល, ទី២-កែប្រែការសងបំណុល រយៈពេលខ្លី ទៅជាការសងបំណុលរយៈពេលវែង និង ៣-ផ្អាកការសងបំណុល ឬកាត់បន្ថយអត្រាការប្រាក់។
លោកស្រីអគ្គនាយក បានបន្ថែមថា អ្នកផ្តល់ប្រាក់កម្ចី (Pico Lender) មានពេលរហូតដល់ថ្ងៃទី៣០ ខែមិថុនា ដើម្បីបញ្ជូនរបាយការណ៍ហិរញ្ញវត្ថុរបស់ខ្លួន សម្រាប់ឆ្នាំសារពើពន្ធ២០១៩។ ជាមួយគ្នានេះ FPO សង្ឃឹមថា វិធានការនេះនឹងជួយដល់អ្នកជំពាក់បំណុលទាំងនោះ អាចជម្នះលើវិបត្ដិកូវីដ-១៩នេះបាន៕