បរទេស៖ នៅក្នុងកិច្ចប្រជុំកំពូល COVAX កាលពីថ្ងៃពុធ (ទី២ ខែមិថុនា ឆ្នាំ២០២១) មេដឹកនាំពិភពលោក បានសន្យាផ្ដល់ថវិកា ២,៤ពាន់លានដុល្លារសហរដ្ឋអាមេរិក សម្រាប់កម្មវិធីសមធម៌ ចែកចាយវ៉ាក់សាំងបង្ការកូវីដ-១៩ទៅដល់ប្រទេសមានចំណូលទាប។
សារព័ត៌មាន The Straits Times បានផ្សាយថា មេដឹកនាំពិភពលោក និងមេដឹកនាំពាណិជ្ជកម្មធំៗ ចំនួន៤០ កាលពីថ្ងៃទី២ ខែមិថុនា បានសន្យាផ្ដល់ថវិកា ប្រហែល ២,៤ពាន់លានដុល្លារសហរដ្ឋអាមេរិក និងវ៉ាក់សាំងបង្ការកូវីដ-១៩ ចំនួន៥៤លានដូស ជូនដល់ Covax facility ដើម្បីផ្ដល់វ៉ាក់សាំងល្អៗ ដល់ប្រទេសមានចំណួលទាប សម្រាប់ចាក់ជូនពលរដ្ឋរបស់ប្រទេសទាំងនោះ ការពារពីជំងឺកូវីដ-១៩។
នៅក្នុងកិច្ចប្រជុំកំពូល Covax Advance Market Commitment (AMC) ដែលរៀបចំឡើង ដោយប្រទេសជប៉ុន និងអង្គការសម្ព័ន្ធភាពវ៉ាក់សាំង Gavi ដែលសម្របសម្រួល COVAX ជាអ្នកធានាឲ្យមានសមធម៌លើការបែងចែកវ៉ាក់សាំងនោះ លោកនាយករដ្ឋមន្រ្ដីជប៉ុន Yoshihide Suga បានសន្យាផ្ដល់ថវិកា ចំនួន ៨០០លានដុល្លារសហរដ្ឋអាមេរិក។
លោកនាយករដ្ឋមន្រ្ដីជប៉ុន បានបញ្ជាក់ថា «ដើម្បីជម្នះទៅលើវិបត្ដិ ដែលយើងកំពុងតែប្រឈមមុខ នាពេលបច្ចុប្បន្ននេះ យើងត្រូវការភាពរឹងមាំ និងការប្ដេជ្ញាចិត្ត ហើយបញ្ហាទាំងនេះមិនអាចធ្វើឡើយ ដោយប្រទេសណាតែម្នាក់ឯងនោះឡើយ»។
ឆ្លើយតបនឹងការអំពាវនាវឲ្យមានការរួបរួមគ្នានេះ មានប្រទេសជាច្រើន រួមមាន អូស្ដ្រាលី ហ្វីលីពីន អេស្ប៉ាញ និងសហរដ្ឋអាមេរិក ក៏ដូចជា អង្គការមិនគិតពីប្រាក់កម្រៃ មានជាអាទិ៍ គ្រឹះស្ថាន Bill និង Melina Gates ក្រុមហ៊ុនធំៗជាច្រើន មានដូចជា Toyota Tsusho, ក្រុមហ៊ុនពាណិជ្ជកម្មជប៉ុន Toyota Group និងធនាគារ UBS ក៏បានបរិច្ចាគទ្រព្យសម្បត្ដិផងដែរ។
លោក Jose Manuel Barroso ប្រធានក្រុមប្រឹក្សាភិបាលរបស់ Gavi បានថ្លែងថា ការបរិច្ចាគកាលពីថ្ងៃពុធ ធ្វើឲ្យជាការបរិច្ចាគនោះ បានកើនឡើង សរុប៩,៦ពាន់លានដុល្លារ សម្រាប់ការទិញវ៉ាក់សាំង និងថវិកា៧៧៥លានដុល្លារ សម្រាប់ការចែកចាយរបស់ពួកគេ។
ក្រុមអ្នកវិទ្យាសាស្រ្ដ បានបញ្ជាក់ថា ការចែកចាយវ៉ាក់សាំង នៅទូទាំងពិភពលោក ជាគន្លឹះដ៏សំខាន់ សម្រាប់បញ្ចប់នូវការរីករាលដាល នៃជំងឺកូវីដ-១៩ ។ កូវីដ-១៩នៅតែបន្ដឆ្លងខ្លាំង នៅក្នុងទ្វីបអាស៊ី បើទោះជាការឆ្លង នៅក្នុងប្រទេសមួយចំនួនបានធ្លាក់ចុះ ដូចជា សហរដ្ឋអាមេរិក អង់គ្លេស និងអ៊ីស្រាអែល ជាទីដែលមានកម្មវិធីចាក់វ៉ាក់សាំងបង្ការមេររោគនាំមុខគេក្ដី។
គ្រឹះស្ថានស្រាវជ្រាវសភាពាណិជ្ជកម្មអន្តរជាតិ បានប៉ាន់ប្រមាណថា វិបត្ដិកូវីដ-១៩នេះបានធ្វើឲ្យពិភពលោកខាតបង់សេដ្ឋកិច្ច ចំនួន ៩,២ លានលានដុល្លារអាមេរិក៕