រាជធានីបាងកក៖ រដ្ឋសភាថៃ កាលពីថ្ងៃពុធ (ទី២ ខែមិថុនា ឆ្នាំ២០២១) បានអនុម័តសេចក្តីព្រាងថវិកាដ៏ចម្រូសចម្រាសមួយ មានទំហំទឹកប្រាក់ ៣,១លានលានបាត (ប្រាក់ថៃ) ឬស្មើនឹង៩៩ ៤៩២ ៩៩០ ៩៨១ដុល្លារសហរដ្ឋអាមេរិក សម្រាប់ឆ្នាំសារពើពន្ធ ២០២២ ដែលចាប់ផ្តើមពីថ្ងៃទី១ ខែតុលា ឆ្នាំ២០២១ ក្នុងគោលបំណងស្តារឡើងវិញនូវសេដ្ឋកិច្ច ដែលរងគ្រោះ ដោយសារការផ្ទុះវីរុសរាតត្បាត។
សារព័ត៌មានបាងកកប៉ុស្ដិ៍ បានចេញផ្សាយ នៅព្រឹក ថ្ងៃទី៣ ខែមិថុនា ឆ្នាំ២០២១ ថា ថវិកាទាំងនេះមានសារសំខាន់ខ្លាំងណាស់ សម្រាប់រដ្ឋាភិបាលរបស់នាយករដ្ឋមន្រ្តី លោក ប្រាយុទ្ធ ចានអូចា ដោយសារវាទាក់ទងទៅនឹងការផ្ទុះឡើងនូវការឆ្លងរាតត្បាពីវីរុសដ៏ធ្ងន់ធ្ងរបំផុត នៅក្នុងប្រទេសអាស៊ានមួយនេះ។ ក្រោយការពិភាក្សាដេញដោលគ្នា អស់រយៈពេល៣ថ្ងៃកន្លងមក សភាថៃក៏បានអនុម័តលើកញ្ចប់ថវិកានេះ ដោយមានសំឡេងគាំទ្រ ២៦៩សំឡេង, សំឡេងប្រឆាំង២០១សំឡេង និងអនុបវាទ ចំនួន២សំឡេង។
លោកឧត្ដមសេនីយ៍ ប្រាយុទ្ធ ចាន់អូចា នាយករដ្ឋមន្រ្ដី បានថ្លែងទៅកាន់រដ្ឋសភាថា ការអនុម័តកញ្ចប់ថវិកានេះ នឹងជួយដោះស្រាយបញ្ហាសេដ្ឋកិច្ចរបស់យើង ឲ្យងើបចេញពីវិបត្ដិសេដ្ឋកិច្ច ដែលបណ្ដាលមកពីការផ្ទុះឡើង នៃរោគរាតត្បាត ក៏ដូចជា ការស្ដារសេដ្ឋកិច្ចឡើងវិញឲ្យបានឆាប់រហ័ស។
ការអនុម័តច្បាប់នេះ ត្រូវឆ្លងកាត់ការផ្ទៀងផ្ទាត់លើកទី២ និងទី៣ ដែលរំពឹងថាសម្រេច នៅខែសីហា មុនពេលបញ្ជូនទៅឲ្យព្រឹទ្ធសភាអនុម័ត ហើយសុំការយល់ព្រមពីព្រះមហាក្សត្រថៃ។
ការព្យាករណ៍ថវិកា នឹងថយចុះ ៥,៧% នៃការចំណាយលើថវិកា៣,១ ពាន់ពាន់លានបាត ក្នុងឆ្នាំសារពើពន្ធ ២០២២ ដោយសារឱនភាព ៧០០ពាន់លានបាត ឬស្មើនឹង ២២ ៤៦៦ ១៥៩ ២៥៣ដុល្លារអាមេរិក កើនឡើង១៥% បើធៀបនឹងឆ្នាំនេះ។
អ្នករៀបចំផែនការថវិកា បានសន្មតថា ប្រទេសមានសេដ្ឋកិច្ចធំទី២ នៅអាស៊ីអាគ្នេយ៍មួយនេះនឹងបង្កើនថវិកា ចន្លោះពី២,៥% ទៅ ៣,៥% នៅឆ្នាំនេះ និង៤,០% ទៅ ៥,០% នៅឆ្នាំ ២០២២ ។
ទោះជាយ៉ាងណា ក្រុមប្រឹក្សាសេដ្ឋកិច្ចជាតិ និងអភិវឌ្ឍន៍សង្គម បានព្យាករពីកំណើនសេដ្ឋកិច្ច ចន្លោះពី១,៥ភាគរយ និង២,៥ភាគ នៅឆ្នាំនេះ រហូតដល់ក្រោយការផ្ទុះជំងឺរាតត្បាត៕