រាជធានីបាងកក៖ ក្នុងរយៈពេល២៤ម៉ោងកន្លងមកនេះ ថៃបន្ដរកឃើញអ្នកទោស និងមន្រ្ដីពន្ធនាគារ ជាង១ ២០០នាក់ បានឆ្លងកូវីដ-១៩ ក្នុងចំណោមករណីថ្មីជិត ៤ ០០០នាក់ ហើយក៏មានករណីស្លាប់ថ្មី ចំនួន៣៩នាក់បន្ថែមទៀត។
ក្រសួងសុខាភិបាលសាធារណៈរបស់ថៃ បានចេញរបាយការណ៍ នៅព្រឹក ថ្ងៃព្រហស្បតិ៍ (ទី៣ ខែមិថុនា ឆ្នាំ២០២១) ថា ក្នុងរយៈពេល២៤ម៉ោងកន្លងមក មជ្ឈមណ្ឌលគ្រប់គ្រងស្ថានភាពកូវីដ-១៩ (CCSA) បានរកឃើញករណីឆ្លងកូវីដ-១៩ថ្មី ចំនួន ៣ ៨៨៦នាក់ ហើយក្នុងនោះមានអ្នកទោស និងមន្រ្ដីពន្ធនាគារ នៅទូទាំងប្រទេស ចំនួន ១ ២៣០នាក់ និងមានករណីស្លាប់ថ្មី ៣៩នាក់។ ប៉ុន្ដែក្នុងរយៈពេលដូចគ្នានេះ នៅថៃក៏មានករណីព្យាបាលជាសះស្បើយ ដោយមិនគិតប្រាក់ ចំនួន ៣ ៦២៦នាក់ផងដែរ។
ទោះជាយ៉ាងណា រហូតមកដល់វេលាខាងលើនេះ ថៃមានអ្នកទោស និងមន្រ្ដីពន្ធនាគារ យ៉ាងតិច ២៥ ០០០នាក់ បានឆ្លងកូវីដ-១៩ ធ្វើឲ្យប្រទេសនេះ មានអ្នកឆ្លងសរុបកើនដល់ ១៦៩ ៣៤៨នាក់ ស្លាប់ ១ ០៥២នាក់ និងជាសះស្បើយ ៩០ ៧៧៨នាក់៕