បរទេស៖ យន្ដហោះយោធារបស់ចិន បានហោះរំលោភចូលដែនអាកាសរបស់ម៉ាឡេស៊ី នាំឲ្យមានការខឹងសម្បាពីអាជ្ញាធររបស់ប្រទេសនេះ រហូតរដ្ឋមន្រ្ដីការបរទេសកោះហៅឯកអគ្គរដ្ឋទូត ចិនមកពន្យល់ អំពីករណីនេះ។
លោក Hishammuddin Hussein ក្រសួងការបរទេសម៉ាឡេស៊ី កាលពីថ្ងៃអង្គារ (ទី១ ខែមិថុនា ឆ្នាំ២០២១ បានថ្លែងថា ម៉ាឡេស៊ីនឹងកោះហៅអគ្គរដ្ឋទូតចិនប្រចាំនៅទីក្រុងម៉ានីល មកបកស្រាយអំពីករណីយន្តហោះយោធាចិន ចំនួន១៦គ្រឿង បានហោះរំលោភចូលមក ក្នុងដែនអាកាសរបស់ខ្លួន នៅក្នុងតំបន់សេដ្ឋកិច្ច (EEZ)។
រដ្ឋមន្រ្តីការបរទេសម៉ាឡេស៊ី បានចេញសេចក្តីថ្លែងការណ៍មួយ កាលពីថ្ងៃទី១ ខែមិថុនា ថា ម៉ាឡេស៊ី នឹងដាក់លិខិតតវ៉ាប្រឆាំងនឹងសកម្មភាពកងទ័ពអាកាសរបស់ចិន ទៅកាន់រដ្ឋាភិបាលទីក្រុងប៉េកាំង។ ជាមួយគ្នានេះ ម៉ាឡេស៊ីក៏នឹងកោះហៅឯកអគ្គរដ្ឋទូតចិន ប្រចាំនៅទីក្រុងគួឡាឡាំពួ មកបកស្រាយ ពីបញ្ហានេះផងដែរ។
សារព័ត៌មានបាងកកប៉ុស្ដិ៍ បានផ្សាយថា មន្រ្ដីស្ថានទូតចិនប្រចាំនៅម៉ាឡេស៊ី បានថ្លែងថា សកម្មភាពកងទ័ពអាកាសរបស់ខ្លួន នាពេលនេះ គ្រាន់តែជាការហ្វឹកហាត់ហោះហើរជាប្រចាំតែប៉ុណ្ណោះ។ ចិនតែងតែគោរពច្បាប់អន្តរជាតិយ៉ាងខ្ជាប់ខ្ជួន ដោយមិនបំពានលើដែនអាកាសរបស់ប្រទេសណាមួយឡើយ។
ទោះជាយ៉ាងណា មន្រ្ដីស្ថានទូតចិនប្រចាំនៅប្រទេសម៉ាឡេស៊ី នៅតែថ្លែងការពារផលប្រយោជន៍របស់ខ្លួនថា ចិនមានគោលបំណងពិភាក្សា ដោយមិត្តភាពជាមួយនឹងភាគីម៉ាឡេស៊ី ដើម្បីថែរក្សាសន្តិភាព និងស្ថិរភាព ទាំងនៅក្នុងតំបន់ និងនៅលើពិភពលោក។
ដោយឡែកកងទ័ពអាកាសរបស់ប្រទេសម៉ាឡេស៊ី វិញ បានអះអាងថា យន្តហោះយោធារបស់ចិន ដែលបានហោះរំលោភចូលមក ក្នុងដែនអាកាសរបស់ខ្លួននោះ រួមមាន យន្តហោះយុទ្ធសាស្រ្ត Ilyushin il-76 និង Xian Y-20 ។ ចិនធ្លាប់បញ្ជូននាវាមួយគ្រឿង ចូលមករុករកប្រេង អស់រយៈពេលជាង១ខែ នៅតំបន់សេដ្ឋកិច្ចពិសេសរបស់ប្រទេសម៉ាឡេស៊ី កាលពីឆ្នាំកន្លងទៅ។
រហូតមកដល់ពេលនេះ ចិនកំពុងតែបង្កើនឥទ្ធិពលយោធារបស់ខ្លួន ទៅលើប្រទេសជិតខាង ហើយសកម្មភាពនេះបង្កឲ្យមានជម្លោះជាមួយនឹងប្រទេសឥណ្ឌា។ ក្រៅពីដែនគោក ចិនក៏កំពុងតែមានមហិច្ឆតាក្ដោបក្ដាប់លើដែនសមុទ្រចិនខាងត្បូង ដែលមានទំហំ ៣,៥លានគីឡូម៉ែត្រការ៉េ ស្ទើរទាំងអស់ រហូតបង្កឲ្យមានជម្លោះកាន់តែក្ដៅឡើងជាមួយចិន រួមមាន ម៉ាឡេស៊ី ប្រ៊ុយណេ, ហ្វីលីពីន, កោះតៃវ៉ាន់ និងវៀតណាម
សមុទ្រចិនខាងត្បូងនេះ ជាទីសម្បូរទៅដោយធនធានជីវចម្រុះ និងឧស្ម័ន។ ដោយឡែកការធ្វើពាណិជ្ជកម្មឆ្លងកាន់ដែនសមុទ្រចិនខាងត្បូងនេះ ត្រូវបានគេប៉ាន់ប្រមាណថា មានទឹកប្រាក់ រហូតដល់ទៅ៣លានលានដុល្លារ ក្នុង១ឆ្នាំ។ ដោយសារតែធនធានធម្មជាតិសម្បូរ និងការធ្វើពាណិជ្ជកម្មឆ្លងកាត់មានតម្លៃមហាសាលបែបនេះ ទើបជំរុញឲ្យចិនមានមហិច្ឆតាច្បាមយកទាំងអស់តែម្ដង៕
