រាជធានីភ្នំពេញ៖ ក្មេងស្រីម្នាក់ បានឈរទាំងកណ្ដាលអធ្រាត្រ រង់ចាំរថយន្ដសង្រ្គោះ មកដឹកនាងទៅព្យាបាលជំងឺកូវីដ-១៩ ដែលមើលទៅពិតជារន្ធត់ នៅក្នុងចិត្តខ្លាំងណាស់ ដោយសារនាងនៅតូច ហើយត្រូវរងការវាយលុកពីមេរោគដ៏កំណាចនេះ។
កុមារីឈ្មោះ ថុង ម៉ានីកា អាយុ៦ឆ្នាំ ត្រូវបានក្រុមគ្រូពេទ្យ នៃមន្ទីរពេទ្យបង្អែកចតុមុខរបស់មន្ទីរសុខាភិបាលរាជធានីភ្នំពេញ ក្រោមការការសម្របសម្រួលពីគណៈបញ្ជាការឯកភាពខណ្ឌ បានចុះមកទទួលនាង នៅនឹងផ្ទះលេខ២៦ ផ្លូវ២២១ ភូមិ៣ សង្កាត់ផ្សារដេប៉ូទី៣ ខណ្ឌទួលគោក។ នាងតូចបានឆ្លងកូវីដ-១៩នេះ ក៏ដោយសារតែបានប៉ះពាល់ជាមួយអ្នកជំងឺ ឈ្មោះ សារឿន ម៉ាឡែន ដែលត្រូវជាម្ដាយមីង ។
កុមារីរូបនេះ កាលពីវេលាម៉ោង១១យប់ ថ្ងៃទី៦ ខែមេសា ឆ្នាំ២០២១ បានឈររង់ចាំ នៅមុខផ្ទះរបស់នាង ដើម្បីទន្ទឹងរង់ចាំរថយន្ដមកដឹក។ បើមើលឃើញរូបភាពនេះ ច្បាស់ជាបងប្អូនទាំងអស់មានការរន្ធត់ចិត្តយ៉ាងខ្លាំង ហើយនឹកអាណិតដល់នាងកាន់តែខ្លាំងឡើង។ នេះមិនមែនជាសាច់ឈាមរបស់ខ្លួនបង្កើតផង ចុះបើកើតមានករណីនេះលើសាច់បង្កើតរបស់ខ្លួនវិញ នោះពិតជាកាន់តែក្ដុកក្ដួលក្នុងចិត្ត ហើយទឹកភ្នែកពិតជាហូរមកទាំងមិនដឹងខ្លួនហើយ។
ទោះជាយ៉ាងណា យើងទាំងអស់គ្នា សូមជូនពរឲ្យនាងតូច ឆាប់បានជាសះស្បើយពីជំងឺកូវីដ១៩នេះ ហើយបានវិលមកជួបជុំគ្រួសាររបស់នាងវិញ៕
