ខេត្តសៀមរាប៖ យុវជនវ័យក្មេងម្នាក់ ទៅបង់សំណាញ់ជាមួយឪពុក ស្រាប់តែជួបនឹងហេតុការណ៍ដ៏អាក្រក់ ច្រាំងមាត់អូរ បាក់សង្កត់ពីលើ បណ្ដាលឲ្យស្លាប់យ៉ាងអាណោចអាធ័ម កាលពីវេលាម៉ោង៥ និង៣០នាទីល្ងាច ថ្ងៃទី៤ ខែមេសា ឆ្នាំ២០២១ នៅក្នុងភូមិរហាល ឃុំតាសៀម ស្រុកស្វាយលើ។
លោក ហ៊ុន ចក់ អាយុ៥៩ឆ្នាំ ត្រូវជាឪពុកបង្កើតរបស់ជនរងគ្រោះ ដែលស្ថិតនៅកន្លែងកើតហេតុនោះ បានឲ្យដឹងថា មុនពេលជួបនឹងហេតុការណ៍ដ៏អាក្រក់នេះ គឺនៅវេលាម៉ោងប្រហែលជា១ និង៣០នាទីរសៀល គាត់បាននាំកូនទៅបង់សំណាញ់ នៅលើស្ពានតូច ស្ថិតនៅភូមិរហាល ឃុំតាសៀម ។ លុះមកដល់វេលាម៉ោង៥ និង៣០នាទីល្ងាច កូនរបស់គាត់បានយកសំណាញ់ទៅគ្របពីលើច្រាំង ក្រោមគុម្ពឫស្សី។ ចំណែកគាត់ក៏នៅក្បែរនោះដែរ ហើយពេលកំពុងតែមុជរាវ ស្រវារកត្រី ស្រាប់តែបាក់មាត់ច្រាំងសង្កត់ ពីលើកូនរបស់គាត់ បណ្ដាលឲ្យស្លាប់មួយរំពេច។ បន្ទាប់មក គាត់បានរាយការណ៍ទៅសមត្ថកិច្ច និងហៅអេស្កាវ៉ាទ័រមកជួយកាយរកសពកូនចេញពីក្នុងទឹក។
មន្រ្ដីនគរបាលស្រុកស្វាយលើ បានឲ្យដឹងថា កាលពីវេលាខាងលើ សមត្ថកិច្ចបានទទួលសេចក្ដីរាយការណ៍ពីករណីនេះ។ បន្ទាប់មក សមត្ថកិច្ចបានចុះទៅពិនិត្យ ហើយហៅអេស្កាវ៉ាទ័រ មកកាយយកសពជនរងគ្រោះ។ ជនរងគ្រោះ ឈ្មោះ ចក់ ចែម ភេទប្រុស អាយុ២១ឆ្នាំ រស់នៅភូមិរហាល ឃុំតាសៀម ស្រុកស្វាយលើ ខេត្តសៀមរាប ។
ក្រោយពេលកើតហេតុ កម្លាំងជំនាញបច្ចេកទេស បានចុះមកពិនិត្យ និងធ្វើកោសល្យវិច័យ រកឃើញថា សពមានស្លាកស្នាមដាច់រលាត់ នៅលើភ្នែក និងខ្ទង់ច្រមុះ បណ្ដាលមកពីការបាក់ច្រាំងអូរ សង្កត់ពីលើ។ បើតាមការពិនិត្យ ឃើញថា ជនរងគ្រោះពិតជាស្លាប់ដោយសារការបាក់ច្រាំងអូរ សង្កត់ប្រាកដមែន ហើយវាពុំមែនពាក់ព័ន្ធនឹងករណីបទល្មើសព្រហ្មទណ្ឌឡើយ៕