រាជធានីភ្នំពេញ៖ ស្ត្រីម្នាក់ជាមេដោះរបស់កូនលោកស្រី ទ្រី ដាណា បានជាប់ចោទពីករណីលួចលុយ ចំនួន ១២ ០០០ដុល្លារ ហើយត្រូវបានចាប់ខ្លួន ប្រគល់ឲ្យកងរាជអាវុធហត្ថខណ្ឌព្រែកព្នៅ កាលពីថ្ងៃទី៣ ខែមីនា ឆ្នាំ២០២១ ស្ថិតក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ។
មន្រ្ដីអាវុធហត្ថខណ្ឌព្រែកព្នៅ បានឲ្យដឹងថា ជនសង័្សយដែលជាប់ចោទពីបទលួច (លុយ) នោះ ឈ្មោះ សំរិត ផល អាយុ៣៥ឆ្នាំ មុខរបរមើលថែកូនរបស់ជនរងគ្រោះ) ស្នាក់នៅក្នុងហាងលក់គ្រឿងអលង្ការទ្រី ដាណា មហាវិថី ឈ្នះ=ឈ្នះ ស្ថិតក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។ រីឯជនរងគ្រោះ ទ្រី សាលីន ភេទប្រុស អាយុ៣៤ឆ្នាំ ជនជាតិខ្មែរ មុខរបរអាជីវករ រស់នៅភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ហើយតំណាងឱ្យជនរងគ្រោះ ឈ្មោះ ទ្រី ដាណា។
មន្រ្ដីអាវុធហត្ថខណ្ឌព្រែកព្នៅ បានបន្ថែមថា បន្ទាប់ពីបានទទួលជនសង្ស័យរួចហើយហើយ សមត្ថកិច្ចក៏បាននាំទៅសាកសួរ។ នៅពេលនេះ ជនសង័្សយបានប្រាប់សមត្ថកិច្ចថា គាត់ពិតជាបានលួចយកលុយរបស់លោកស្រី ទ្រី ដាណា ចំនួន ១២ ០០០ដុល្លារអាមេរិក (មួយម៉ឺនពីរពាន់ដុល្លារ) ពិតប្រាកដមែន។
ក្រោយពេលសាកសួរជាបឋមហើយ សមត្ថកិច្ចបានបញ្ជូនជនសង័្សយទៅកាន់ការិយាល័យប្រឆាំងបទល្មើសព្រហ្មទណ្ឌ នៃកងរាជអាវុធហត្ថរាជធានីភ្នំពេញ ដើម្បីចាត់ការបន្តតាមនីតិវិធី៕
