រាជធានីភ្នំពេញ៖ ក្រោយពេលសមត្ថកិច្ចបង្ក្រាបទៅលើមេខ្លោងឧក្រិដ្ឋជន ដែលបាននាំបក្ខពួកចូលទៅប្លន់ ចាប់ជំរិត និងរៀបចំគម្រោងសម្លាប់មួយគ្រួសារនោះមក តែរហូតមកដល់ថ្ងៃទី៤ ខែមីនា ឆ្នាំ២០២១ ក៏នៅមិនទាន់មានសាច់ញាតិណាអើពើ ស្រាប់តែចំប៉ីខ្មៅចេញមុខប្រកាសធ្វើបុណ្យ ៧ ថ្ងៃ និងទិញកោដ្ឋដាក់ធាតុឲ្យ។
ចំប៉ីខ្មៅ បានប្រកាសលើហ្វេសប៊ុករបស់ខ្លួនថា ខ្មោចដែលបានស្លាប់បាត់ទៅហើយ ប៉ុន្ដែនៅឡើយតែកេរ្ដិ៍ឈ្មោះស្អុយ។ មនុស្សយើងគ្មានអ្នកណាម្នាក់ដឹងថា ខ្លួននឹងស្លាប់ ព្រោះអ្វី នៅកន្លែងណា នៅទីណានោះទេ។ ការស្លាប់មិនដឹងថាពេលណា សូម្បីតែពេលវេលាថ្ងៃនេះ ឬថ្ងៃស្អែក ថ្ងៃណាមួយក៏មិនដឹងដែរ។ មេខ្លោងឧក្រិដ្ឋជន អ៊ឹម សុវណ្ណារិទ្ធ បានស្លាប់បាត់ទៅហើយ ហើយខ្ញុំមិនមែនជាញាតិ និងក៏មិនដែលស្គាល់ មិនដែលជួបដែរ។
ចំប៉ីខ្មៅ បានបន្ដថា រិទ្ធ បានស្លាប់ទៅហើយ ហើយខ្ញុំបានត្រឹមតែទិញកោដ្ឋដាក់ឆ្អឹងឱ្យ និងនិមន្តព្រះសង្ឃសូត្រមន្តឱ្យតែប៉ុណ្ណឹង។ ខ្ញុំសង្ឃឹមថា មិត្តដែលធ្លាប់ជល់កែវជាមួយរិទ្ធ នឹងមកជូនដំណើរគាត់ចុងក្រោយ។ មនុស្សណាមិនធ្លាប់ខុស តែគ្នាស្លាប់ទៅហើយ ឆ្អឹង ធាតុគ្នា គួរតែដាក់ឱ្យបានសមរម្យជាមនុស្ស។ ខ្ញុំសង្ឃឹមថា ពុកម៉ែបងប្អូន នឹងអហោសិកម្មឱ្យចោរ ដែលស្លាប់ទៅហើយនេះ។ សូម្បីតែបងប្អូនរបស់គេ ក៏មិនបានអើពើដែរ តែខ្ញុំមានតែជួយរក្សាបានប៉ុណ្ណឹង។
ចំប៉ីខ្មៅ បានបញ្ជាក់ថា នៅពេលគម្រប់បុណ្យ៧ថ្ងៃ ខ្ញុំនឹងនិមន្តព្រះសង្ឃសូត្រមន្តតាមប្រពៃណី នៃពិធីបុណ្យសព បើពុកម៉ែបងប្អូន យល់ថាការធ្វើបុណ្យ ត្រូវរើសថា ជាមនុស្សល្អ ឬ អាក្រក់ ជាសិទ្ធិ ក្នុងការសម្រេចចិត្តរបស់អ្នកទាំងអស់គ្នា តែសូមធ្វើបុណ្យជាមួយចោរមួយក្បាលដែលគ្នាស្លាប់ទៅគ្មានញាតិផងនេះផង»។
សូមជម្រាបថា អ៊ឹម សុវណ្ណារិទ្ធ ជាមេខ្លោងឧក្រិដ្ឋបានរៀបចំគម្រោងរួចរាល់ហើយ ទើបនាំបក្ខពួកចូលទៅចាប់ប្លន់ និងចាប់ជំរិត ដោយមានគម្រោងសម្លាប់ជនរងគ្រោះអស់មួយគ្រួសារ ហើយត្រូវបានសមត្ថកិច្ចកងរាជអាវុធហត្ថបង្ក្រាបបានទាន់ពេលវេលា កាលពីថ្ងៃទី១ ខែមីនា ឆ្នាំ២០២១ នៅក្នុងបុរីអង្គរភ្នំពេញ ស្ថិតក្នុងខណ្ឌសែនសុខ រាជធានីភ្នំពេញ៕
