ខេត្តបាត់ដំបង៖ បុរសល្មោភកាមម្នាក់ឃើញក្មេងស្រីអាយុ៩ឆ្នាំម្នាក់ កំពុងតែដេកលង់លក់ នៅក្នុងដំណេកតែម្នាក់ ក៏ចូលទៅចាប់រំលោភ រហូតបានសម្រេច ប៉ុន្ដែអំពើដ៏លាមកបែបនេះ កម្មតាមផ្ដន្ទាភ្លាមៗ ក៏ត្រូវសមត្ថកិច្ចចុះទៅឃាត់ខ្លួន កាលពីវេលាម៉ោង៧ និង៣០នាទីព្រឹក ថ្ងៃទី០២ ខែកុម្ភៈ ឆ្នាំ២០២១ ដើម្បីនាំទៅចាត់ការតាមច្បាប់។
លោកវរសេនីយ៍ឯក ស៊ុន សុវណ្ណ អធិការនគរបាលស្រុកសង្កែ បានឲ្យដឹងថា ជនសង័្សយជាប់ចោទពីករណីរំលោភខាងលើនេះ ឈ្មោះ ហួត ហៃ អាយុ៣៥ឆ្នាំ រស់នៅភូមិរាំងក្រោល ឃុំរាំងកេសី ស្រុកសង្កែ ខេត្តបាត់ដំបង។ រីឯកុមារីរងគ្រោះ ឈ្មោះ ក.រ អាយុ៩ឆ្នាំ រស់នៅក្នុងខេត្ដបាត់ដំបង។
លោកអធិការនគរបាលស្រុកសង្កែ បានឲ្យដឹងថា បើតាមការរៀបរាប់របស់ម្ដាយក្មេងស្រីរងគ្រោះ បានឲ្យដឹងថា កាលពីយប់ ថ្ងៃទី១ ខែកុម្ភៈ ឆ្នាំ២០២១ គាត់មិននៅផ្ទះ ហើយទុកកូនស្រីឲ្យនៅតែម្នាក់ឯង។ លុះមកដល់វេលាម៉ោង៨យប់ ថ្ងៃដដែលនោះ ស្រាប់តែជនសង័្សយបានចូលទៅចាប់រំលោភកូនស្រីរបស់គាត់ ទើបនឹងមានអាយុ៩ឆ្នាំ។
លោកអធិការនគរបាលស្រុកសង្កែ បានបញ្ជាក់ថា ក្រោយពេលមានពាក្យបណ្ដឹងពីអាណាព្យាបាលរបស់ក្មេងស្រីរងគ្រោះរួចមក កម្លាំងជំនាញបានចុះទៅស៊ើបអង្កេត ស្រាវជ្រាវ និងឃាត់ខ្លួនជនសង្ស័យ (ឈ្មោះ ហួត ហៃ) នៅក្នុងភូមិព្រៃចែក ឃុំកំពង់ព្រះ ស្រុកសង្កែ នាំមកសាកសួរតាមជំនាញរបស់សមត្ថកិច្ច។
ដោយឡែក ជនសង្ស័យ បានសារភាពប្រាប់សមត្ថកិច្ចថា រូបគេពិតជាបានប្រព្រឹត្តដូចការចោទប្រកាន់ប្រាកដមែន (រំលោភបានសម្រេច) ខណ:ក្មេងស្រីកំពុងតែដេក នៅក្នុងផ្ទះតែម្នាក់ឯង ហើយម្តាយរបស់នាងក៏មិននៅផ្ទះដែរ។
ក្រោយពេលទទួលបានចម្លើយសារភាពបែបនេះ សមត្ថកិច្ចបានឃាត់ខ្លួនជនសង័្សយ នៅក្នុងអធិការដ្ឋាននគរបាលស្រុក ដើម្បីកសាងសំណុំរឿងបញ្ជូនទៅកាន់សាលាដំបូងខេត្ត ចោទប្រកាន់ និងផ្ដន្ទាទោសតាមច្បាប់៕