បរទេស៖ បើតាមសារព័ត៌មាន Sputnik របស់រុស្ស៊ី បាន ផ្សាយ កាលពីរាត្រី ថ្ងៃទី១៨ ខែមករា ឆ្នាំ២០២១ ថា អ៊ីរ៉ង់ កាលពីថ្ងៃទី១៦ ខែមករា បានបាញ់សាកល្បងមីស៊ីលបាល្លីស្ទិក ទៅលើគោលដៅ នៅក្នុងសមុទ្រ ដោយឆ្លងកាត់ឈូងសមុទ្រអូម៉ង់។ រីឯការបាញ់មីស៊ីលរបស់អ៊ីរ៉ង់នេះ បានកើតឡើង គឺមួយថ្ងៃ មុនពេលយន្ដហោះទម្លាក់គ្រាប់បែកយុទ្ធសាស្រ្ដ B-52H របស់អាមេរិក ចំនួន២គ្រឿង ហោះលើប្រទេសអ៊ីស្រាអែល និងឈូងសមុទ្រពែក្ស។ សកម្មភាពបែបនេះអាចជាសញ្ញាបង្ហាញពីភាពតានតឹងដាក់គ្នា រវាងប្រទេសជាសត្រូវទាំង២នេះផងដែរ។
អ៊ីរ៉ង់ បានប្រកាសថា កងទ័ពរបស់ខ្លួន នឹងធ្វើសមយុទ្ធយោធា នៅឈូងសមុទ្រអូម៉ង់ នៅថ្ងៃទី១៩ ខែមករា ពោលគឺមួយថ្ងៃ មុនពេលលោក ចូ បៃដិន ស្បថចូលកាន់តំណែងជាប្រធានាធិបតីទី៤៦របស់សហរដ្ឋអាមេរិក។
លោកឧត្ដមសេនីយ៍ Kiomars Heidari មេបញ្ជាការកងទ័ពជើងគោកអ៊ីរ៉ង់ បានប្រាប់ភ្នាក់ងារសារព័ត៌មាន Tasnim កាលពីថ្ងៃទី១៨ ខែមករា ថា ការធ្វើសមយុទ្ធយោធា នៅក្នុងឈូងសមុទ្រអូម៉ង់នេះ នឹងចាប់ផ្ដើម នៅថ្ងៃទី១៩ ខែមករា នៅជិតកំពង់ផែទីក្រុង Makran នៅភាគខាងកើតខេត្ត Baluchistan ជិតព្រំដែនប្រទេសប៉ាគីស្ថាន។ រីឯគោលបំណងដ៏សំខាន់ នៃល្បែងសង្គ្រាមនេះ គឺដើម្បីវាយតម្លៃលើការចល័ត និងប្រតិកម្មរហ័សរបស់កម្លាំងទ័ព និងអង្គភាពចល័ត នៃកងទ័ពជើងគោក។
លោកឧត្ដមសេនីយ៍ បានបញ្ជាក់ថា ការធ្វើសមយុទ្ធយោធានេះ នឹងអនុវត្តលើការឆ្លើយតបយ៉ាងរហ័ស និងម៉ឺងម៉ាត់ ចំពោះការគំរាមកំហែង ពីសត្រូវ នៅលើឆ្នេរសមុទ្រនេះ។ ជាមួយគ្នានេះដែរ កងទ័ពអ៊ីរ៉ង់ កាលពីថ្ងៃទី១៦ ខែមករា បានបាញ់សាកល្បងមីស៊ីលផ្លោង ចេញពីលើដី សំដៅទៅដល់គោលដៅ នៅក្នុងសមុទ្រ ក្នុងចម្ងាយ ១ ៨០០ គីឡូម៉ែត្រ ដោយឆ្លងកាត់ឈូងសមុទ្រអូម៉ង់ ស្ថិតក្នុងមហាសមុទ្រឥណ្ឌា។
ដោយឡែក សហរដ្ឋអាមេរិក វិញ បានបញ្ជូនយន្ដហោះទម្លាក់គ្រាប់បែកយុទ្ធសាស្រ្ដ B-52H ដ៏មានឥទ្ធិពលខ្លាំងក្លារបស់ខ្លួន ទៅកាន់តំបន់មជ្ឈិមបូព៌ា នៅមុនថ្ងៃចូលស្បថឡើងកាន់តំណែងរបស់លោក ចូ បៃដិន។ នេះជាសារមួយរបស់អាមេរិក បង្ហាញទៅកាន់សម្ពន្ធមិត្តរបស់ខ្លួន និងអ៊ីរ៉ង់ដែលជាសត្រូវថា អាមេរិកនៅតែការពារនូវសម្ពន្ធមិត្ត និងផលប្រយោជន៍របស់អាមេរិក នៅក្នុងតំបន់នេះ។ អាមេរិកបានត្រៀមលក្ខណៈប្រយុទ្ធជាស្រេច ប្រសិនបើអ៊ីរ៉ង់ហ៊ានវាយប្រហារ ឬធ្វើសកម្មភាពដ៏អាក្រក់ណាមួយប៉ះពាល់ដល់អាមេរិក និងសម្ពន្ធមិត្ដរបស់ខ្លួន៕
