បរទេស៖ គ្រោះរញ្ជួយដី មានកម្លាំង ៦,៤ រ៉ិចទ័រ បានវាយប្រហារ នៅក្នុងស្រុក Petrinja ជិតទីក្រុងZagreb ប្រទេសក្រូអាត បណ្ដាលឲ្យរងការខូចខាតយ៉ាងដំណំ។
លោក Andrej Plenkovic នាយករដ្ឋមន្ត្រីក្រូអាត បានប្រកាសតាមកញ្ចក់ទូរទស្សន៍ថា យើងទទួលបានព័ត៌មានថា មានក្មេងស្រីម្នាក់ស្លាប់ និងមានមនុស្សជាច្រើននាក់ផ្សេងទៀត បានរបួស។ នៅពេលនេះលោកបានធ្វើដំណើរទៅកាន់តំបន់មានការរញ្ជួយដីនោះ ដើម្បីត្រួតពិនិត្យមើលអំពីស្ថានភាពគ្រោះថ្នាក់ដោយផ្ទាល់ និងជួយដល់ប្រជាពលរដ្ឋរងគ្រោះ។
បើតាមបណ្តាញទូរទស្សន៍ HRTបានផ្សាយថា ស្រុក Petrinja បានរងនូវការបំផ្លាញស្ទើរតែទាំងស្រុង។ ក្រៅពីនេះ ក៏មានមនុស្សជាច្រើននាក់បានរងរបួស ហើយក៏មានមនុស្សជាច្រើននាក់ផ្សេងទៀត កំពុងជាប់ នៅក្រោមគំនរ នៃអគារបាក់បែកផងដែរ។ ដោយឡែក ក្រុមអ្នកជួយសង្គ្រោះកំពុងតែខិតខំ ស្វែងរកអ្នកជាប់នៅក្រោមអគារបាក់បែក ដើម្បីជួយសង្រ្គោះឲ្យទាន់ពេលវេលា។ ជាមួយគ្នានេះ កងទ័ពបានបញ្ជូនរថយន្ដជាច្រើនគ្រឿង ទៅកាន់តំបន់នោះ ដើម្បីជួយដល់ប្រជាពលរដ្ឋផងដែរ។
លោក Darinko Dumbovic មន្ត្រីក្នុងតំបន់ បានបញ្ជាក់ថា «ស្រុករបស់យើងខ្ញុំ បានរងការបំផ្លាញស្ទើរតែទាំងស្រុង ពីគ្រោះធម្មជាតិរញ្ជួយដីនេះ ហើយមានមនុស្សស្លាប់ និងរបួសជាច្រើន។ គ្រោះធម្មជាតិនេះ មានលក្ខណៈសាហាវដូចការទម្លាប់គ្រាប់បែកបរមាណូ នៅក្នុងទីក្រុងហ៊ីរ៉ូស៊ីម៉ា ប្រទេសជប៉ុនយ៉ាងដូច្នោះដែរ»៕