បរទេស៖ បើតាមគេហទំព័រ Worldometer បានចេញផ្សាយ កាលពីវេលាម៉ោង៩ និង៣០ព្រឹក ថ្ងៃទី២៩ ខែធ្នូ ឆ្នាំ២០២០ ថា ស្ថានភាពកូវីដ-១៩ បាន និងកំពុងបន្ដរាតត្បាត នៅលើប្រទេស និងដែនដី ចំនួន២១៨ នៅទូទាំងពិភពលោក ដោយមានអ្នកឆ្លងបន្ដកើតឡើង 81 669 201នាក់ ស្លាប់ 1 781 438នាក់ និងជាសះស្បើយ 57 795 502នាក់។
ទោះជាយ៉ាងណា រហូតមកដល់ពេលនេះ សហរដ្ឋអាមេរិក នៅតែជាប្រទេសរងគ្រោះខ្លាំងជាងគេបំផុត ដោយមានអ្នកស្លាប់ និងឆ្លងកូវីដ-១៩ច្រើន នៅលើពិភពលោក។ ប្រទេសមហាអំណាចលេខ១ ទាំងយោធា និងសេដ្ឋកិច្ចរបស់ពិភពលោកមួយនេះ មានអ្នកឆ្លង បន្ដកើតឡើងដល់ 19 781 624នាក់ ស្លាប់ 343 182នាក់ និងជាសះស្បើយ 11 696 727នាក់។ រីឯប្រទេសដែលមានអ្នកឆ្លងច្រើនជាងគេ បន្ទាប់ពីអាមេរិក រួមមាន ឥណ្ឌា ប្រេស៊ីល រុស្ស៊ី បារាំង អង់គ្លេស…ជាដើម។
អឺរ៉ុប ជាតំបន់ មានអ្នកឆ្លងជំងឺកូវីដ-១៩លំដាប់លេខ១ នៅលើពិភពលោក ដោយមានអ្នកឆ្លងសរុប កើនដល់22 865 696នាក់ ស្លាប់ 525 474នាក់ និងជាសះស្បើយ 11 177 933នាក់។ ប្រទេសមានអ្នកឆ្លងច្រើន នៅក្នុងតំបន់អឺរ៉ុប រួមមាន រុស្ស៊ី បារាំង អង់គ្លេស អ៊ីតាលី អេស្ប៉ាញ និងអាល្លឺម៉ង់…ជាដើម។
អាមេរិកខាងជើង ជាតំបន់ មានអ្នកឆ្លងច្រើនលំដាប់លេខ២ នៅលើពិភពលោក ដោយមានអ្នកឆ្លង សរុប កើនដល់ 22 689 314នាក់ ស្លាប់ 500 461នាក់ និងជាសះស្បើយ 13 949 648នាក់។ ប្រទេសមានអ្នកឆ្លងច្រើន នៅក្នុងតំបន់នេះ រួមមាន សហរដ្ឋអាមេរិក ម៉ិកស៊ីក កាណាដា …ជាដើម។
អាស៊ី ជាតំបន់ មានអ្នកឆ្លងកូវីដ-១៩ ច្រើនជាងគេលំដាប់លេខ៣ នៅលើពិភពលោក ដោយមានអ្នកឆ្លងសរុប បន្ដកើនដល់ 20 434 528នាក់ ស្លាប់ 333 299 និងជាសះស្បើយ 18 879 259នាក់។ រីឯប្រទេសដែលមានអ្នកឆ្លងច្រើនជាងគេ នៅតំបន់អាស៊ី រួមមាន ឥណ្ឌា តួកគី អ៊ីរ៉ង់ ឥណ្ឌូនេស៊ី អ៊ីរ៉ាក់ បង់ក្លាដែស និងហ្វីលីពីន …ជាដើម។
អាមេរិកខាងត្បូង ជាតំបន់មានអ្នកឆ្លងច្រើន លំដាប់លេខ៤ នៅលើពិភពលោក ដោយមានអ្នកឆ្លងសរុប កើនដល់ 12 937 666នាក់ ស្លាប់ 357 682នាក់ និងជាសះស្បើយ 11 505 723នាក់។ ប្រទេស មានអ្នកឆ្លងច្រើន នៅក្នុងតំបន់នេះ រួមមាន ប្រេស៊ីល អាហ្សង់ទីន កូឡុំប៊ី ប៉េរូ និងឈីលី …ជាដើម។
អាហ្វ្រិក ជាតំបន់ មានអ្នកឆ្លងច្រើន លំដាប់លេខ៥ នៅលើពិភពលោក ដោយមានអ្នកឆ្លងសរុប កើនដល់ 2 693 189នាក់ ស្លាប់ 63 449នាក់ និងជាសះស្បើយ 2 248 807នាក់។ ប្រទេសមានអ្នកឆ្លងច្រើន នៅក្នុងតំបន់នេះ រួមមាន អាហ្វ្រិកខាងត្បូង ម៉ូរ៉ុកកូ និងអេហ្ស៊ីប…ជាដើម។
អាសេអានី ជាតំបន់ មានការឆ្លងតិចជាងគេបំផុត នៅលើពិភពលោក ដោយមានអ្នកឆ្លងសរុប 48 087នាក់ ស្លាប់1 058នាក់ និងជាសះស្បើយ 33 426នាក់។ ប្រទេស និងដែនដី នៅក្នុងតំបន់នេះ មានអ្នកឆ្លងច្រើនជាងគេ រួមមាន ប្រទេសអូស្រ្ដាលី, French Polynesia, នូវ៉ែលហ្សេឡង់ដ៍…ជាដើម។
សូមជម្រាបថា វីរុសកូរ៉ូណា ហៅកាត់ កូវីដ-១៩ (Coronavirus Disease 2019 = Covid-19) នេះ បានផ្ទុះឡើងជាលើកដំបូង នៅក្នុងទីក្រុងវូហាន (ចិនអាន៖ អ៊ូហាន) ខេត្តហ៊ូប៉ី នាភាគកណ្ដាល នៃប្រទេសចិន កាលពីអំឡុងខែធ្នូ ឆ្នាំ២០១៩។ រហូតមកដល់ពេល វីរុសនេះ កំពុងតែរាតត្បាលពាសពេញពិភលោក ដោយមានប្រទេស និងដែនដីចំនួន២១៨ កំពុងឆ្លងមេរោគនេះ៕