រាជធានីភ្នំពេញ៖ បុរស៣នាក់ចេញពីកន្លែងលេងកីឡា ជិះម៉ូតូមកដល់ផ្ទះ ស្រាប់តែមានបុរស ម្នាក់ស្រែកជេរបញ្ចោរ រួចហើយដកកាំភ្លើងខ្លីមកគំរាម បង្កឱ្យមានការភ្ញាក់ផ្អើលឡើង កាលពីវេលាម៉ោង១២ និង៥០នាទីរំលងអធ្រាត្រ ឈានចូលថ្ងៃទី១៧ ខែធ្នូ ឆ្នាំ២០២០ នៅតាមផ្លូវលេខ៦១២ ស្ថិតក្នុងសង្កាត់បឹងកក់ទី២ ខណ្ឌទូលគោក។
បើតាមសម្ដីរបស់បុរសរងគ្រោះទាំង៣នាក់ខាងលើ បានឱ្យដឹងថា មុនពេលកើតហេតុ ពួកគេទាំង៣នាក់ ទើបនឹងចេញពីលេងកីឡា។ លុះពេលពួកគេវិលត្រឡប់មកដល់ផ្ទះវិញ ស្រាប់តែមានបុរសម្នាក់អង្គុយ មកនៅបង់មុខផ្ទះរបស់ពួកគេ ហើយស្រែកជេរបញ្ចោរមកលើពួកខ្លួន ទាំងមិនដឹងមូលហេតុ។ ឮបែបនេះ ពួកគេបានខឹងសម្បាយ៉ាងខ្លាំង ក៏ចុះទៅសួរនាំ ស្រាប់តែបុរសនោះបានដកកាំភ្លើងខ្លី ចេញពីចង្កេះ ធ្វើឱ្យពួកគេទាំង៣នាក់ភ័យខ្លាច ក៏បង្កឲ្យភ្ញាក់ផ្អើលដល់សមត្ថកិច្ច ចេញមកធ្វើអន្តរាគមន៍។
ដោយឡែកបុរសជាម្ចាស់ផ្ទះ បានឱ្យដឹងថា មុនពេលកើតហេតុ គាត់កំពុងតែអង្គុយលេងនៅមុនផ្ទះ។ លុះមកដល់វេលាខាងលើ ស្រាប់តែលេចមុខបុរស៣នាក់នេះ ជិះម៉ូតូ២គ្រឿង កាត់មុខផ្ទះរបស់គាត់ ដោយបង្កសំឡេងម៉ូតូខ្លាំងៗពេក ទើបធ្វើឲ្យគាត់អត់ទ្រាំពុំបាន ក៏ស្រែកដាក់បុរសទាំង៣នាក់។ ប៉ុន្ដែស្រាប់តែពួកគេជិះម៉ូតូត្រឡប់ បកក្រោយវិញ ដើរសំដៅមករកគាត់។ ឃើញសភាពដូចមិនសូវស្រួល ទើបគាត់ដកកាំភ្លើងខ្លី ចេញពីចង្កេះ ដើម្បីការពារខ្លួន ក៏បង្កឱ្យកើតមានការឈ្លោះប្រកែកគ្នាយកត្រូវរៀងៗខ្លួន រហូតភ្ញាក់ផ្អើលដល់អ្នកសារព័ត៌មាន ចុះមកឡាយផ្ទាល់ ហើយសមត្ថកិច្ចក៏បានចុះមកធ្វើអន្តរាគមន៍។
ក្រោយពេលកើតហេតុ នគរបាលមូលដ្ឋានបាននាំភាគីទាំងសងខាង ទៅកាន់ប៉ុស្តិ៍នគរបាលរដ្ឋបាលបឹងកក់២ ដើម្បីសម្របសម្រួលគ្នា។ ប៉ុន្ដែក្រោយមានការសម្របសម្រួលគ្នាបានមួយសន្ទុះ ទើបភាគីម្ចាស់ផ្ទះសុខចិត្តបង់ជំងឺចិត្ត ចំនួន៥០០ដុល្លារទៅឱ្យបុរសទាំង៣នាក់នោះដើម្បីបញ្ចប់រឿង៕