ខេត្តព្រះសីហនុ៖ ភ្លៀងកក់ខែ កាលពីយប់ ថ្ងៃទី១៥ ខែធ្នូ បានបង្អុរចុះមកមួយ ធ្វើទឹកហូរនាំទៅជាមួយនឹងសំរាមចាក់ចូលទៅក្នុងប្រព័ន្ធទឹក គរឡើងដូចភ្នំ នៅក្នុងទីក្រុងព្រះសីហនុ។
បញ្ហាសំរាមនេះ នៅតែជាបញ្ហាចោទមួយយ៉ាងខ្លាំង មិនថា នៅក្នុងទីរួមខេត្តព្រះសីហនុ និងរាជធានីភ្នំពេញនេះ បើនិយាយរួម គឺមានពាសពេញតំបន់ទីប្រជុំជន។ ករណីនេះ ក៏បណ្ដាលមកពីបងប្អូនយើងខ្វះការយល់ដឹងអំពីការរក្សាអនាម័យ និងគុណតម្លៃ នៃបរិស្ថាន ទើបពួកគាត់បោះសំរាមចោលពាលវាលពាសកាល ដោយខ្វះការគ្រប់គ្រងសំរាមឲ្យបានល្អ។
បើតាមទំព័របណ្ដាញសង្គមផ្លូវការរបស់លោក គួច ចំរើន អភិបាលខេត្តព្រះសីហនុ បានសរសេរ នៅថ្ងៃទី១៦ ខែធ្នូ ថា ភ្លៀងមួយមេយប់មិញ សំរាមចូលពេញអូស្ដេចមឹក ផ្លូវ៣០១ កុំអីចូលពេញសមុទ្រទៀត។ ស្រុកយើងសំបូរណាស់សំរាម មិនថាក្នុងទឹក ឬលើគោកនោះទេ។ អនាម័យ នាំមកនូវសុខភាពល្អ។
ទោះជាយ៉ាងណា រហូតមកដល់ពេលនេះ បញ្ហាសំរាមនៅតែជាប្រធានបទ នៃការជជែកគ្នាប្រចាំថ្ងៃរបស់ពលរដ្ឋ ទាំងអ្នករស់នៅក្នុងរាជធានី និងនៅទីប្រជុំជននានា ទូទាំងប្រទេស។ គេមានការរអ៊ូរទាំ អំពីភាពយឺតយ៉ាវ នៃការប្រមូលសំរាមផង និងការបង្ហាញអារម្មណ៍ អំពីភាពខ្វះអនាម័យ នៅតាមដងផ្លូវ ទើបធ្វើឲ្យដងផ្លូវនានា សម្បូរទៅដោយសំរាម។ ជួនពេលខ្លះ សំរាមមានការរាយប៉ាយ នៅតាមដងផ្លូវ ដោយសារតែពលរដ្ឋមួយចំនួន មិនបានចូលរួមសម្អាត ហើយខ្វះខាតការយល់ដឹងអំពីគុណតម្លៃ នៃបរិស្ថាន។
ដោយឡែក នៅរាជធានីភ្នំពេញ សំរាមបានកើនឡើង ពីរង្វង់២ ៦០០តោន ក្នុងមួយថ្ងៃ នៅឆ្នាំ២០១៨ រហូតដល់រង្វង់២៩០០តោន ក្នុងមួយថ្ងៃ នៅក្នុងឆ្នាំ២០១៩កន្លងទៅ។ សាលារាជធានីភ្នំពេញ ធ្លាប់បញ្ជាក់ថា ទីលានចាក់សំរាម មានទំហំជាង៣០ហិកតា នៅបឹងជើងឯក ក្នុងខណ្ឌដង្កោ នឹងត្រូវពេញហៀរ មិនអាចទទួលយកសំរាមបានទៀតឡើយ នៅឆ្នាំ២០២១។ នេះគឺជាបញ្ហាប្រឈមដែលទាមទារឲ្យមានដំណោះស្រាយជាបន្ទាន់។
បញ្ហាសំរាម គឺជាបញ្ហារួមរបស់យើងរាល់គ្នា ហើយវាមិនមែនជាបញ្ហាដាច់ដោយឡែករបស់អាជ្ញាធរតែឯងឡើយ។ ការរួមចំណែកដោះស្រាយបញ្ហាសំរាម វាទាមទារឲ្យមានការចូលរួមពីប្រជាពលរដ្ឋផងដែរ ព្រោះសំរាមកើតចេញពីការរស់នៅរបស់ពលរដ្ឋ។ ដូច្នេះ ការទុកដាក់សំរាមឲ្យត្រឹមត្រូវតាមប្រភេទ និងមានរបៀបរៀបរយ គឺជារឿងចាំបាច់បំផុត ដែលត្រូវផ្តើមដំបូង ចេញពីប្រជាពលរដ្ឋតែម្ដង៕