ភ្នំពេញ៖ បុរសម្នាក់ ស្រវឹងស្រាស្រឿងៗជិះម៉ូតូជ្រុលទៅបុកឡានស៊េរីទំនើបពីក្រោយ បណ្តាលឲ្យរងការខូចខាតបែកកញ្ចក់ឡាន និងម្ចាស់ម៉ូតូរបួសរយៈមុខមាត់ ដែលហេតុការណ៌នេះបានបង្កឲ្យមានការភ្ញាក់ផ្អើលកាលពីវេលាម៉ោង៩និង១០នាទីយប់ ថ្ងៃទី០៤ ខែតុលា ឆ្នាំ២០២០ ស្ថិតតាមបណ្ថោយផ្លូវ២៧១ កែងផ្លូវ៤៨០ ក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ។
មុនពេលកើតហេតុគេឃើញបុរសជនជាតិចិនម្នាក់រួមដំណើរដោយស្ត្រីម្នាក់និងកូនក្មេង បើករថយន្តស៊េរីរីទំនើបម៉ាក AUDI Q5 ពណ៌កណ្ដុលប្រមេះ ពាក់ស្លាកលេខភ្នំពេញ2AY -9705 ធ្វើដំណើរតាមបណ្ដោយផ្លូវ២៧១ ទិសដៅពីត្បូងទៅជើងក្នុងល្បឿនមធ្យម ខណៈមកដល់ចំណុចកើតហេតុនេះបានជាន់ហ្វាំងឈប់ដោយមានរថយន្តមិនចាំម៉ាកបើកឆ្លងកាត់ពីមុខ ភ្លាមនោះស្រាប់តែមានម៉ូតូមួយគ្រឿងម៉ាក ហុងដាឌ្រីម ស៊េរីឆ្នាំ២០២០ ពណ៌ខ្មៅ ពាក់ស្លាកលេខភ្នំពេញ1ID -6535 ជិះដោយបុរសម្នាក់ក្នុងសភាពស្រវឹងមកពីក្រោយស្របគ្នាក្នុងល្បឿនយ៉ាងលឿន និងមិនប្រយ័ត្នជ្រុលទៅបុករថយន្តAUDIពីក្រោយពេញទំហឹងបណ្ដាលឲ្យខូចខាតកញ្ចក់ខាងក្រោយទាំងស្រុង ឯម្ចាស់ម៉ូតូរងរបួសមុខមាត់តិចតួច ។
សមត្ថកិច្ចមូលដ្ឋានបានចុះមកដល់ចំណុចកើតហេតុនេះ ដោយឃើញមិនប៉ះពាល់សម្បត្តិរដ្ឋ ក៏បានឲ្យភាគីទាំងពីរសម្របសម្រួលគ្នា ដោយភាគីខាងម៉ូតូបង្កព្រមសងសំណងចំនួន២០០ដុល្លាដើម្បីបញ្ចប់រឿង ៕
