រាជធានីបាងកក៖ ប្រជាពលរដ្ឋខ្មែរឆ្លងដែន ដោយខុសច្បាប់ ចូលទៅទឹកដីថៃ ក៏ត្រូវប៉ូលិសខេត្តស្រះកែវ បានឃាត់ខ្លួនពួកគេ ចំនួន១៣នាក់ នៅតាមព្រំដែន នៃខេត្ដនេះ តែបើគិតក្នុងរយ:ពេល២សប្ដាហ៍កន្លងមកនេះ អាជ្ញាធរថៃ បាន ឃាត់ខ្លួនពលរដ្ឋខ្មែរចំនួន២៣នាក់។
បើតាមសារព័ត៌មានថៃ Phuket Gazette បានផ្សាយ កាលពីថ្ងៃទី២៧ ខែ កញ្ញា ឆ្នាំ២០២០ ថា ប៉ូលិសថៃ បានចាប់ខ្លួន ជនអន្ដោប្រវេសន៍ជាជនជាតិខ្មែរ ចំនួន១៣នាក់ ឆ្លងដែនដោយខុសច្បាប់ ចូលមកក្នុងប្រទេសថៃ នៅតាម ព្រំដែន ខេត្ដស្រះកែវ ( Sa Kaeo) ។ ការឃាត់ខ្លួនពួកគេនេះ បានធ្វើឡើង នៅវេលាម៉ោង២រំលងអធ្រាត្រ នៅភូមិ Ban Nong Phai ឃុំ Ta Phraya ខេត្តស្រះកែវ។
ប៉ូលិស បានឲ្យដឹងថា ជនអន្ដោប្រវេសន៍ទាំងនេះ បានឆ្លងដែន ដោយខុស ច្បាប់ ចូលមកក្នុងប្រទេសថៃ តាមរយ:មេខ្យល់ ហើយមានជនជាតិថៃ ជាអ្នកបើករថយន្ដទៅចាំទទួល។ រីឯជនជាតិខ្មែរទាំងនេះ នឹងត្រូវគេដឹកទៅកាន់ Nonthaburi ក្រុងបាងកក និង Nakhon Nayok ហើយខេត្តដទៃទៀត។
បើតាមសម្ដីពលករទាំងនោះ បានប្រាប់ប៉ូលិសថៃថា ពួកគេត្រូវបង់លុយចំនួន៣០០០បាត (លុយថៃ) ទៅឲ្យមេខ្យល់ សម្រាប់ការនាំឆ្លងដែនចូលមកក្នុងប្រទេសថៃ។
ប៉ូលិសថៃ បានបញ្ជាក់ថា ជនអន្ដោប្រវេសន៍ ជាជនជាតិខ្មែរទាំងនេះ នឹងត្រូវបញ្ជូនទៅកាន់ស្ថានីយប៉ូលិសTa Phraya ដើម្បីចោទប្រកាន់តាមផ្លូវច្បាប់។ ប៉ុន្ដែទោះជាយ៉ាងណាក៏ដោយ គេនៅមិនទាន់ដឹងថា អ្នកបើកបរជាជនជាតិថៃ ដែលដឹកជញ្ជូនជនអន្ដោប្រវេសន៍ខុសច្បាប់នោះ នឹងត្រូវប្រឈមមុខនឹងការចោទប្រកាន់ដែរ ឬយ៉ាងណានោះទេ។ ប៉ុន្ដែបើគិតក្នុងរយ:ពេល២សប្ដាហ៍កន្លងមកនេះ អាជ្ញាធរថៃបានចាប់ខ្លួនជនអន្ដោប្រវេសន៍ខ្មែរចំនួន២៣នាក់រួចមកហើយ។
រហូតមកដល់ពេលនេះ អាជ្ញាធរថៃបានបង្កើនការត្រួតពិនិត្យ នៅតាមព្រំដែនជាមួយនឹងប្រទេសជិតខាងយ៉ាងខ្លាំង ក្រោយផ្ទុះការរាតត្បាត នៃវីរុសកូរ៉ូណាកាន់តែច្រើនឡើង នៅក្នុងប្រទេសមីយ៉ាន់ម៉ា។ សកម្មភាពរបស់អាជ្ញាធរថៃបែបនេះ ក៏ដោយសារតែថៃមានការភ័យខ្លាច អំពីរលកទី២ នៃកូវីដ១៩នេះ៕
