ខេត្តបាត់ដំបង៖ យុវជនម្នាក់ដែលជាពលរដ្ឋខ្មែរ បានរងរបួសលើដៃស្តាំម្ខាងយ៉ាងធ្ងន់ធ្ងរ ដោយបានបញ្ជូនទៅសង្គ្រោះនៅឯមន្ទីរពេទ្យបង្អែក ខេត្តបាត់ដំបង ទាំងយប់ផងដែរ ខណៈដែលយុវជនរូបនេះ រួមទាំងបក្ខពួកប្រមាណ២៩នាក់ បានលបឆ្លងដែនចូលទៅក្នុងទឹកដីថៃ ដើម្បីរកកាប់ឈើលក់ឲ្យមេឈ្មួញស្រី ដែលឈរជើងចាំទទួលទិញប្រចាំតំបន់នេះ។
តាមប្រភពនៅតំបន់នោះបានឲ្យដឹងថា នៅមុនពេលកើតហេតុ គឺមានប្រជាពលរដ្ឋប្រមាណ២៩នាក់ ដែលជាកូនចៅរកស៊ីកាប់ឈើលក់ទៅឲ្យមេឈ្មួញដ៏ធំប្រចាំតំបន់នេះ ដោយពួកគេបាននាំគ្នាលបឆ្លងដែន ចូលទៅក្នុងទឹកដីថៃ ដើម្បីរកកាប់ឈើដូចសព្វមួយដង។ ប្រភពបានបន្តថា នៅពេលនោះដែរ ក៏ស្រាប់តែកម្លាំងយោធាថៃប្រចាំខ្សែបន្ទាត់ព្រំដែន បានធ្វើការបាញ់រះជាច្រើនគ្រាប់មកលើពួកគេ បណ្តាលឲ្យចំដៃស្តាំម្នាក់ឈ្មោះ ចាន់ ឧត្តម ភេទប្រុស អាយុ២០ឆ្នាំ រស់នៅភូមិអូរត្រែង ឃុំតាតោក ស្រុកសំឡូត គឺមុខរបួសមានសភាពរយះយ៉ាងធ្ងន់ធ្ងរ ដោយនៅពេលនោះដែរ ពួកគេបាននាំគ្នារត់គេចរៀងៗខ្លួន ត្រឡប់មកកាន់ទឹកដីខ្មែរវិញ ដោយឡែកជនរងគ្រោះក៏ត្រូវបានក្រុមគ្រួសារ ដឹកបញ្ជូនទៅសង្គ្រោះនៅមន្ទីរពេទ្យបង្អែក ខេត្តបាត់ដំបងផងដែរ៕