អតីតសមាជិក នៃកងទាហានពិសេសរបស់កងទ័ពសហរដ្ឋអាមេរិកត្រូវបានចាប់ខ្លួនដោយភ្នាក់ងារសហព័ន្ធដោយត្រូវប្រឈមមុខនឹងការជាប់ពន្ធនាគារអស់មួយជីវិតបន្ទាប់ពីត្រូវបានគេចោទប្រកាន់ថា បានឃុបឃិតជាមួយភ្នាក់ងារស៊ើបការណ៍សម្ងាត់របស់រុស្ស៊ីដើម្បីផ្តល់ព័ត៌មានការពារជាតិរបស់សហរដ្ឋអាមេរិកទៅឱ្យរុស្ស៊ី ។ នេះបើយោងតាមប្រភពពីទីភ្នាក់ងារសារព័ត៌មាន Sputnik ដែលបានចេញផ្សាយកាលពីថ្ងៃទី២១ ខែសីហា ឆ្នាំ២០២០ ។
លោក Peter Rafael Dzibinski Debbins អាយុ៤៥ឆ្នាំ ជាអ្នកស្រុក Gainesville រដ្ឋ Virginia និងជាអតីតកងទ័ពពិសេសរបស់អាមេរិក «Green Beret» ត្រូវបានចោទប្រកាន់ពីបទ សមគំនិតក្នុងការផ្តល់ព័ត៌មានការពារជាតិអាមេរិកដល់ភ្នាក់ងាររបស់រដ្ឋាភិបាលបរទេស នេះបើយោងតាមនាយកដ្ឋានយុត្តិធម៌ បានឱ្យដឹងកាលពីថ្ងៃសុក្រ ទី២១ ខែសីហា ឆ្នាំ២០២០ ។
ព្រះរាជអាជ្ញាសហព័ន្ធបានអះអាងថា Debbins បានជួបជាមួយភ្នាក់ងារស៊ើបការណ៍សម្ងាត់របស់រុស្ស៊ី ខណៈដែលរូបគេបានធ្វើទស្សនកិច្ចជាច្រើនលើកទៅកាន់ប្រទេសរុស្ស៊ី ។ អតីតទាហានពិសេសរូបនេះត្រូវបានគេចោទប្រកាន់ថា ជាភ្នាក់ងារចារកម្មដោយលួចផ្តល់ព័ត៌មានដល់ប្រទេសរុស្ស៊ី ។
ព្រះរាជអាជ្ញាសហព័ន្ធអះអាងថា ក្នុងរយៈពេលនៃការបម្រើកងទ័ពរបស់លោក Debbins អតីតទាហានពិសេសរបស់អាមេរិករូបនេះបានបែងចែកព័ត៌មានដែលគាត់បានទទួល ក៏ដូចជាព័ត៌មានលម្អិតអំពីអង្គភាពគីមីដើម្បីផលិតអាវុធ និងព័ត៌មានអំពីអង្គភាពពិសេសរបស់គាត់ ។
លោក James A. Dawson នាយកស្តីទីការិយាល័យស៊ើបអង្កេតសហព័ន្ធ FBI ប្រចាំនៅទីក្រុងវ៉ាស៊ីនតោនបានថ្លែងថា ៖«យោងតាមការចោទប្រកាន់នេះ លោក Debbins បានផ្តល់ព័ត៌មានដល់សមាជិក នៃភ្នាក់ងារស៊ើបការណ៍សម្ងាត់របស់ខ្លួនឈ្មោះ GRU ។ សេចក្តីថ្លែងការណ៍ជាលាយលក្ខណ៍អក្សរ ។ ប្រសិនបើត្រូវបានផ្តន្ទាទោសលោក Debbins នឹងត្រូវប្រឈមមុខនឹងការជាប់ពន្ធនាគារអស់១ជីវិត» ។
ការចាប់ខ្លួនអតីតទាហានពិសេសរូបនេះធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីការប្រកាសរបស់ព្រះរាជអាជ្ញាអំពីការចាប់ខ្លួនអតីតភ្នាក់ងារស៊ើបការណ៍កណ្តាលអាមេរិកលោក Alexander Yuk Ching Ma កាលពីថ្ងៃទី១៤ ខែសីហា ពីបទ «សមគំនិតក្នុងការផ្តល់ព័ត៌មានទាក់ទងនឹងព័ត៌មានការពារជាតិឱ្យប្រទេសដទៃ» ។
លោក Alexander Yuk Ching Ma ដែលមានអាយុ៦៧ឆ្នាំ ដែលជាអ្នករស់នៅរដ្ឋហាវ៉ៃ ត្រូវបានចោទប្រកាន់ពាក់ព័ន្ធនឹងមន្ត្រីចិនថា បានផ្តល់ប្រាក់ចំនួន៥ម៉ឺនដុល្លារជាថ្នូរនឹងការផ្តល់ព័ត៌មានស្តីពី «ប្រតិបត្ដិការ និងវិធីសាស្ត្រលាក់បាំងពីការតាមដានរបស់ CIA» ។
យោងទៅតាមព្រះរាជអាជ្ញាបានឱ្យដឹងថា ក្រោយមកលោកបានផ្តល់ឯកសារចំរុះផ្សេងៗគ្នាឱ្យអ្នកតំណាងទីក្រុងប៉េកាំង ខណៈដែលលោកកំពុងបម្រើការក្នុងការិយាល័យរបស់ FBI ។
ជំនួយការអគ្គព្រះរាជអាជ្ញារងផ្នែកសន្តិសុខជាតិលោក ចន ស៊ីដេស បានអះអាងថា ៖«ការចាប់ខ្លួនមនុស្សពីរនាក់គឺលោក Alexander Yuk Ching Ma និងលោក Peter Rafael Dzibinski Debbins បង្ហាញថា យើងត្រូវតែប្រយ័ត្នប្រយែងប្រឆាំងនឹងចារកម្មពីសត្រូវដែលមានគំនិតអាក្រក់បំផុតពីរគឺប្រទេសរុស្ស៊ី និងចិន» ៕
ប្រភព ៖ Sputnik , ដោយ ៖ សំណាង
