រដ្ឋមន្ត្រីការពារជាតិអ៊ីរ៉ង់លោក Amir Hatami បាននិយាយនៅក្នុងសុន្ទរកថា តាមទូរទស្សន៍មួយនៅថ្ងៃព្រហស្បតិ៍នេះដោយមិនអើពើនឹងការទាមទាររបស់សហរដ្ឋអាមេរិកឱ្យក្រុងតេអេរ៉ង់ត្រូវបញ្ឈប់កម្មវិធីមីស៊ីលរបស់ខ្លួន ។ នេះបើយោងតាមប្រភពពីទីភ្នាក់ងារសារព័ត៌មាន Reuters ដែលបានចេញផ្សាយនៅរសៀលថ្ងៃទី២០ ខែសីហា ឆ្នាំ២០២០ នេះ ។
លោក Amir Hatami រដ្ឋមន្ត្រីការពារជាតិអ៊ីរ៉ង់បាននិយាយថា ពេលនេះយើងមានមីស៊ីលផ្លោងថ្មី ដែលមានឈ្មោះថា «Qassem Soleimani» (ជាឈ្មោះរបស់មេបញ្ជាការជាន់ខ្ពស់អ៊ីរ៉ង់ដែលត្រូវអាមេរិកប្រើដ្រូនស៊ើបការសម្ងាត់បាញ់សម្លាប់ ) អាចបាញ់រយៈចម្ងាយ ១៤០០ គីឡូម៉ែត្រ និងមីស៊ីលបំពាក់លើរថយន្តដែលមានឈ្មោះថា «martyr Abu Mahdi» (ឈ្មោះរបស់មេបញ្ជាការជាន់ខ្ពស់ដែលដើរតួយ៉ាងសំខាន់ដឹកនាំកម្ទេចក្រុមភារវករ ISIS នៅក្នុងប្រទេសអ៊ីរ៉ាក់) អាចបាញ់គោលដៅមានរយៈចម្ងាយជាង ១០០០ គីឡូម៉ែត្រ ។
គួររម្លឹកផងដែរថា លោក Qasem Soleimani ជាមេដឹកនាំកម្លាំងវរសេនាតូចរបស់អ៊ីរ៉ង់ និងជាមេបញ្ជាការកងជីវពលអ៊ីរ៉ាក់ត្រូវបានសម្លាប់កាលពីខែមករាកន្លងទៅនេះក្នុងការវាយប្រហាររបស់សហរដ្ឋអាមេរិកទៅលើក្បួនរថយន្តរបស់លោកនៅអាកាសយានដ្ឋានបាដាដដែលជាហេតុធ្វើឱ្យអ៊ីរ៉ង់ខឹងសម្បារជាខ្លាំង និងថែមទាំងទាមទាររកយុត្តិធម៌ជូនមេបញ្ជាការជាន់ខ្ពស់របស់ពួកគេថែមទៀតផង ហើយបច្ចុប្បន្នអ៊ីរ៉ង់កំពុងព្យាយាមផលិតសព្វាវុធដើម្បីពង្រឹងវិស័យយោធារបស់ខ្លួនទោះបីជាមានទណ្ឌកម្មពីសហរដ្ឋអាមេរិកពាក់ព័ន្ធនឹងការផលិតសព្វាវុធក្តី ៕
ប្រភព ៖ Reuters , ដោយ ៖ សំណាង