អតីតប្រធានាធិបតីសហរដ្ឋអាមេរិកលោក បារ៉ាក់ អូបាម៉ា កាលពីថ្ងៃពុធ ទី១៩ ខែសីហា ឆ្នាំ២០២០ បានអះអាងថា លោក ដូណាល់ ត្រាំ មិនសមនឹងអង្គុយក្នុងការិយាល័យប្រធានាធិបតីសហរដ្ឋអាមេរិកនោះទេ ព្រោះតែមិនបានយកចិត្តទុកដាក់ចំពោះសុខទុក្ខប្រជាជនអាមេរិក និងលទ្ធិប្រជាធិបតេយ្យរបស់សហរដ្ឋអាមេរិក ហើយថែមទាំងបានអះអាងថា ការបោះឆ្នោតឱ្យលោក ចូ ប៊ីដិន (Joe Biden) ធ្វើជាប្រធានាធិបតីអាមេរិកគឺចាំបាច់ណាស់ដើម្បីធានាលទ្ធិប្រជាធិបតេយ្យអាមេរិកទាំងមូល ។ នេះបើយោងតាមប្រភពពីទីភ្នាក់ងារសារព័ត៌មាន Reuters ដែលបានចេញផ្សាយនៅព្រឹកថ្ងៃទី២០ ខែសីហា ឆ្នាំ២០២០ នេះ ។
អតីតប្រធានាធិបតីសហរដ្ឋអាមេរិករូបនេះបានស្តីបន្ទោសលោក ដូណាល់ ត្រាំ ចំពោះវិធានការទប់ស្កាត់ជំងឺរាតត្បាត Covid-19 ដែលបណ្តាលឱ្យជនជាតិអាមេរិកជាច្រើននាក់បានស្លាប់ ការងាររាប់លានបានបាត់បង់ដោយសារការធ្លាក់ចុះនៃសេដ្ឋកិច្ច និងការកាត់បន្ថយគោលការណ៍ប្រជាធិបតេយ្យរបស់ប្រទេសទាំងនៅក្នុងស្រុក និងក្រៅប្រទេស ។
លោក អូបាម៉ា បានមានប្រសាសន៍ថា ៖«លោក ដូណាល់ ត្រាំ គ្មានភាពរីកចម្រើននៅក្នុងការងារជាប្រធានាធិបតីរបស់គាត់នោះទេ ពីព្រោះគាត់មិនអាចធ្វើបាន ។ ហើយផលវិបាកនៃការបរាជ័យនោះគឺធ្ងន់ធ្ងរណាស់» ។
នៅលើបណ្តាញសង្គម Twitter លោក ដូណាល់ ត្រាំ ក៏បានឆ្លើយតបទៅនឹងការរិះគន់របស់លោក អូបាម៉ា ដែលធ្វើការរិះគន់រូបលោក និងការសម្រេចចិត្តរបស់លោក អូបាម៉ា ក្នុងការគាំទ្រលោក ប៊ីដិន ដែលជាគូប្រជែងតំណែងប្រធានាធិបតីសហរដ្ឋអាមេរិកគឺជារឿងមិនសមរម្យ ។
ប៉ុន្តែកាលពីថ្ងៃពុធកន្លងទៅលោក អូបាម៉ា បានថ្លែងសុន្ទរកថា គាំទ្រពេញទំហឹងលើលោក ប៊ីដិន និងបេក្ខជនអនុប្រធានាធិបតីលោកស្រី Kamala Harris ដោយនិយាយថា ពួកគេពិតជាយកចិត្តទុកដាក់ចំពោះជនជាតិអាមេរិក ហើយពួកគេក៏យកចិត្តទុកដាក់យ៉ាងខ្លាំងចំពោះលទ្ធិប្រជាធិបតេយ្យរបស់សហរដ្ឋអាមេរិកផងដែរ ៕
ប្រភព ៖ Reuters , ដោយ ៖ សំណាង