មីយ៉ាន់ម៉ា ៖ គិតត្រឹមព្រឹកថ្ងៃទី០៣ កក្កដា ២០២០នេះ ការរអិលបាក់ដីនៅអណ្តូងរ៉ែមួយ នៅភាគខាងជើងប្រទេសមីយ៉ាន់ម៉ា បានសម្លាប់មនុស្សយ៉ាងហោចណាស់ ១៦២ នាក់ ។ អាជ្ញាធរបាននិយាយថា ចំនួនអ្នកស្លាប់ទំនងជានឹងកើនឡើងថែមទៀត នេះបើតាមប្រភពព័ត៌មាន aljazeera ។
ឧប្បត្តិហេតុនេះ បានកើតឡើងកាលពីវេលាម៉ោង ០៨:០០ ព្រឹកថ្ងៃព្រហស្បតិ៍ ទី០២ ខែកក្កដា នៅក្នុងភូមិសាសែត សង្កាត់ហាប់ផាន់ ដែលសម្បូរដោយរ៉ែត្បូង បន្ទាប់ពីមានភ្លៀងមូសុង ធ្លាក់ខ្លាំង ។
សារព័ត៌មានក្នុងស្រុក បានផ្សាយថា នុស្សជាច្រើនទៀតកំពុងជាប់គាំងនៅក្នុងនោះ ។ អ្នកស្លាប់ និងរបួសទាំងអស់ គឺជាអ្នករើសអេតចាយក្នុងស្រុក ហើយប្រតិបត្តិការជួយសង្គ្រោះ ត្រូវបានផ្អាកបណ្តោះអាសន្ន ខណៈដែលស្ថានភាពមានគ្រោះថ្នាក់ខ្លាំង ។
ទន្ទឹមនឹងនេះដែរ សហគ្រាសមីយ៉ាន់ម៉ា កាលពីពេលថ្មីៗនេះ បានចេញសេចក្តីណែនាំដល់ក្រុមហ៊ុនរុករករ៉ែថ្មខៀវ ឱ្យផ្អាកប្រតិបត្តិការនៅទីតាំងទាំងនោះ រយៈពេល៣ខែ ចាប់ពីថ្ងៃទី១ ខែកក្កដា ដល់ថ្ងៃទី៣០ ខែកញ្ញា ឆ្នាំ២០២០៕
