វ៉ាក់សាំងការពារជំងឺរាតត្បាត Covid-19 ដែលអភិវឌ្ឍឡើងដោយក្រុមហ៊ុនបច្ចេកវិទ្យាជីវសាស្ត្រឈ្មោះ CanSino Biologics ដោយមានការចូលរួមពីសំណាក់បណ្ឌិតសភាវិទ្យាសាស្ត្រវេជ្ជសាស្ត្រយោធាចិន បានសម្រេចជោគជ័យក្នុងការផលិតវ៉ាក់សាំងនេះ និងដាក់ឱ្យប្រើប្រាស់ចំពោះយោធាចិនមុនគេបង្អស់ ។ នេះបើយោងតាមប្រភពពីទីភ្នាក់ងារសារព័ត៌មាន Sputnik ដែលបានចេញផ្សាយកាលពីពេលថ្មីៗនេះ ។
តាមសេចក្តីថ្លែងការរបស់ក្រុមហ៊ុនបច្ចេកវិទ្យាជីវសាស្ត្រខាងលើបានឱ្យដឹងថា ៖«យើងសូមប្រកាសដោយរីករាយថាវ៉ាក់សាំង Ad5-nCoV រួមគ្នាបង្កើតឡើងជាមួយវិទ្យាស្ថានជីវសាស្ត្រក្រោមបណ្ឌិតសភាវិទ្យាសាស្ត្រវេជ្ជសាស្ត្រយោធា ទទួលបានការយល់ព្រមពីការិយាល័យសុខាភិបាល កាលពីថ្ងៃទី២៥ មិថុនា ដើម្បីក្លាយជាថ្នាំដែលត្រូវការចាំបាច់សម្រាប់យោធា» ។
សេចក្តីថ្លែងការណ៍បានបន្ថែមទៀតថា សុពលភាពនៃការអនុម័តនេះគឺមានរយៈពេលមួយឆ្នាំ ហើយបានសង្កត់ធ្ងន់ថាវ៉ាក់សាំងនេះនឹងត្រូវប្រើសម្រាប់តែយោធាចិនប៉ុណ្ណោះ ដោយមិនអាចយកទៅប្រើប្រាស់សម្រាប់ការចាក់វ៉ាក់សាំងឱ្យបានធំទូលាយដោយគ្មានការយល់ព្រមពីគណៈកម្មាធិយោយោធាកណ្តាលឡើយ ។
យោងតាមសេចក្តីថ្លែងការណ៍របស់ក្រុមហ៊ុនបានបញ្ជាក់ថា ការអភិវឌ្ឍវ៉ាក់សាំងនេះបានបញ្ចប់ការសាកល្បងដំណាក់កាលទី២ កាលពីថ្ងៃទី១១ មិថុនា ហើយជាលទ្ធផលត្រូវបានរកឃើញថា មានភាពវិជ្ជមានទាក់ទងនឹងសុវត្ថិភាព និងប្រសិទ្ធភាពនៃវ៉ាក់សាំង ៕
